Májilis depýtattary, «AMANAT» fraktsiiasynyń músheleri – Aina Mysyrálimova men Natalia Dementeva Aqmola óńirine jumys saparymen baryp, «AMANAT» partiiasynyń sailaýaldy baǵdarlamasy aiasynda iske asyp jatqan birqatar nysanda boldy.
Birinshi kezekte depýtattar Aqkól qalasynda meditsina qyzmetkerlerine arnalǵan emdeý-saýyqtyrý ortalyǵynyń qurylysy barysymen tanysty. Onyń qurylysyna biýdjetten 4,5 mlrd teńge bólinip otyr. Merdiger kompaniianyń ókili qurylystyń kestege sai júrgizilip jatqanyn jáne belgilengen merzimde aiaqtalatynyn atap ótti.
– Dál qazirgi ýaqytta elektr, telekommýnikatsiia men sý jelileri tartylyp jatyr. Sonymen qatar emdeý korpýsynyń, qonaq úi men basseinniń qurylysy qarqyndy júrgizilýde. Qurylys aiaqtalǵan soń ortalyqta 50 adamdy jumyspen qamtý kózdelýde, – dedi qurylys barysyn tanystyrǵan «SENIM» densaýlyq saqtaý qyzmetkerleriniń salalyq kásipodaǵy» tóraǵasynyń keńesshisi Dina Nurpeiisova.
Májilis depýtattary Aqkól qalasyndaǵy №4 orta mektepte de boldy. Qazir onda sport zal men ashana salynyp jatyr. Budan bólek, halyq qalaýlylary emdeý-saýyqtyrý qonaq úi keshenine bardy. Onyń qurylysy biyl aiaqtalady dep josparlanyp otyr. Mamandar demalys ortalyǵy astanalyqtar men irgeles jatqan aýdan turǵyndary úshin jaily demalys ornyna ainalady degen senimde.
Sondai aq A.Mysyrálimova men N.Dementeva 900 turǵyny bar Dombyraly aýylynda 16 shaqyrym sý qubyryn jóndeý jumystarymen tanysty. Qazirgi tańda 2,2 shaqyrym qubyr tóselip, 43 uńǵyma ornalastyrylǵan.
– Partiianyń qoǵamdyq qabyldaýlaryna Dombyraly aýylyndaǵy sý qubyrlaryn jóndeý boiynsha talai aryz-shaǵym kelip tústi. Sondyqtan aýdandyq máslihat janyndaǵy «AMANAT» fraktsiiasynyń músheleri aýyl turǵyndaryn taza aýyz sýmen qamtamasyz etý máselesin erekshe baqylaýynda ustaýy kerek, – dedi Aina Mysyrálimova.
Májilis depýtattary aýdandyq máslihattaǵy depýtattyq fraktsiia múshelerimen «AMANAT» partiiasy sailaýaldy baǵdarlamasynyń Jol kartasynyń oryndalý barysyn talqylap, azamattardy qabyldady.
