Maimyl sheshegin juqtyrǵandar sany 200-ge jetti, - dep habarlaidy Tengrinews.kz agenttigi Reuters saityna silteme jasap.
Bul týraly Dúniejúzilik densaýlyq saqtaý uiymynyń ókili aitty. Uiym málimetinshe, maimyl sheshegin juqtyrǵandar sanynyń artýy endemiialyq aimaqtarǵa jasalǵan saparlarǵa bailanysty emes. Keiingi málimetter boiynsha, infektsiia kóbine erler arasynda anyqtalǵan.
Aita keteiik, qazir Ispaniiada rastalǵan jaǵdaidyń eń kóp sany tirkelgen. El biligi infektsiianyń 25 jańa jaǵdaiyn rastady, nátijesinde aýrý juqtyrǵandar sany 84-ke jetti. Odan keiin Ulybritaniiada 14 jańa jaǵdai tirkelgeni anyqtaldy, onda juqtyrǵandar sany 70-ke jetti.
Aita keteiik, buǵan deiin Jeneva ýniversitetiniń Jahandyq densaýlyq saqtaý institýtynyń direktory Antýan Flao maimyl sheshek aýrýyn juqtyrǵandar sany artýy indettiń bastalǵanyn bildirýi múmkin ekenin aitqan bolatyn.
Maimyl sheshegi - adamdarǵa janýarlardan beriletin, 1970 jyldary Kongo Demokratiialyq Respýblikasynda tirkelgen sirek kezdesetin virýstyq zoonozdy aýrý. Simptomdaryna bas aýrýy jáne teri bórtpeleri jatady. Bórtpe betten bastalyp, deneniń qalǵan bóligine taraidy.
Eske salaiyq, buǵan deiin DDSU maimyl sheshegi aýrýyn talqylaý úshin sarapshylardyń tótenshe jinalysyn shaqyrǵan bolatyn. Sonymen qatar, uiym ókili Afrikadan tys jerlerde maimyl sheshek virýsyna qarsy jappai vaktsina alýdyń qajeti joq dep sanaitynyn jetkizgen edi.
