Búgin, 23 tamyzda Qazaqstanda alǵash ret Quryltai depýtattarynyń sailaýy ótip jatyr. Osyǵan bailanysty Parlament Senatynyń burynǵy spikeri Máýlen Áshimbaev pen Parlament Májilisiniń eks-spikeri Erlan Qoshanov sailaý ýchaskesine baryp, óz tańdaýlaryn jasady, dep habarlaidy ult.kz.
Máýlen Áshimbaev bul kúndi el tarihyndaǵy mańyzdy oqiǵa dep atap, ár azamattyń sailaýǵa belsendi qatysýy mańyzdy ekenin aitty.
«Búgin – egemen elimizdiń jylnamasyna erekshe ekpinmen jazylatyn tarihi kún. Halqymyz alǵash ret Quryltai depýtattaryn sailap jatyr. Osyndai jaýapty kezeńde ár azamattyń belsendiligi mańyzdy ról atqarady. Sondyqtan biz de sailaý ýchaskesine baryp, óz tańdaýymyzdy jasadyq», – dedi ol.
Onyń aitýynsha, Quryltai sailaýy Memleket basshysy Qasym-Jomart Toqaevtyń bastamasymen júzege asyrylyp jatqan saiasi reformalardyń jalǵasy sanalady.
Áshimbaev Quryltai qyzmeti ashyqtyq, keń ókildik jáne halyq aldyndaǵy eseptilik qaǵidattaryna negizdeletinin atap ótti. Onyń pikirinshe, bul ózgerister Ádiletti Qazaqstandy qurý jolyndaǵy mańyzdy qadamdardyń biri.
Al burynǵy Parlament Májilisiniń spikeri Erlan Qoshanov ta Qazaqstan temir joly ǵimaratynda ornalasqan sailaý ýchaskesinde daýys berdi.
«Búgin elimiz úshin tarihi kún. Qazaqstandyqtar jańa Quryltaidyń depýtattaryn sailap jatyr. Bul – jurtshylyqtyń keń qoldaýyna ie bolǵan jańa Halyqtyq Konstitýtsiiany is júzinde júzege asyrýǵa baǵyttalǵan mańyzdy qadam. Memleket basshysy júrgizip otyrǵan aýqymdy reformalardyń zańdy nátijesi», – dedi Qoshanov.
Ol sailaý ýchaskelerine azamattardyń tańerteńnen bastap belsendi túrde kelip jatqanyn aityp, qazaqstandyqtardy ózderiniń azamattyq paryzyn oryndaýǵa shaqyrdy.
Aita keteiik, jańa saiasi júiege sáikes Qazaqstanda burynǵy eki palataly Parlament – Senat pen Májilistiń ornyna bir palataly Quryltai jumys isteitin bolady. Quryltai eldiń zań shyǵarý organyna ainalyp, onyń depýtattary jalpyulttyq sailaý arqyly qalyptastyrylady.
Quryltai sailaýy – Qazaqstannyń jańa saiasi modelin qalyptastyrýdaǵy mańyzdy kezeńderdiń biri. Máýlen Áshimbaev pen Erlan Qoshanov azamattardy el bolashaǵyna áser etetin bul úderiske belsendi qatysýǵa úndedi.
