QR Prezidenti Ákimshiligi basshysynyń birinshi orynbasary Máýlen Áshimbaev Prezidenttik jastar kadr rezervine iriktelgenderdiń bolashaǵy qalai bolatyny týraly aitty, dep habarlaidy "Ult aqparat".
«Jalpy alǵanda bári bir sátte taǵaiyndalmaitynyn eskerý kerek. Jaqyn bolashaqta Prezidenttik jastar kadr rezervine qatysýshylar memlekettik organdar men Ulttyq kompaniialarda ártúrli pozitsiiada jumys isteitin bolady. Qatysýshylardyń keibiri karerasyn jeke sektorda jalǵastyrǵysy kelýi múmkin. Bul - olardyń quqyǵy, ol jaqqa da jaqsy daiyndyqtan ótken mamandar qajet», - deidi Máýlen Áshimbaev Ortalyq kommýnikatsiialar qyzmetinde ótken brifingte.
Ol jumysqa ornalasý mezanizmi qalai júzege asatynyn aityp ótti.
«Birinshiden, jariialanǵan tizim men soǵan sáikes qujattar ákimderge, ministrlerge, memlekettik organ basshylaryna jiberiledi. Ár memlekettik organ men ministrlikterge jaqsy mamandar tapshy ekeni sózsiz. Olar tizimdi qarap, jas mamandardy ózderine jumysqa shaqyrady. Ekinshiden, Prezident Ákimshiligi óz quzireti sheginde qajetti mekemelerge qajetti mamandardy usynatyn bolady. Úshinshiden, QR Prezidenti Qasym-Jomart Toqaev prezidenttik jastar kadr rezervi boiynsha óz betinshe sheshim qabyldap, jaýapty memlekettik pozitsiiaǵa taǵaiyndaýy múmkin. Osy baǵyttar boiynsha jumystar kelesi jyldan bastap birneshe jyl qatarynan júzege asady jáne Prezident Ákimshiligi tarapynan baqylaýda bolady», - deidi ol.
Aita ketý kerek, irikteý jeńimpazdarynyń ortasha jasy - 31-de. Bul rette rezervshilerdiń ekonomikanyń túrli salalarynda aitarlyqtai tájiribesi bar. Olardyń kóbi iri sheteldik jáne transulttyq kompaniialarda jumys isteidi jáne jumys istegen.
