Elordadaǵy Ulttyq akademiialyq kitaphanada ótip jatqan «Shyǵystyń shoqjuldyzdary» atty halyqaralyq konferentsiiada Senat Tóraǵasy Máýlen Áshimbaev ulttyq qundylyqtardy dáripteý baǵytyndaǵy jumystarǵa toqtaldy, dep habarlaidy QazAqparat.
«Álem túrki jurtynyń rýhani áleýetin uly tulǵalarymyz ben olardyń ómirsheń týyndylary arqyly tanidy. Osynaý alyp shaiyrlardyń murasy máńgilik jasampazdyq kúshke ie.
Tipti olardy túrki halyqtarynyń ózara baýyrlastyǵynyń altyn dińgegi desek te qatelespeimiz. Sol sebepti, olardyń murasyn jaryqqa shyǵarý, aýdarý, zertteý – bizderge mindet. Osy mindettiń údesinen shyǵa bilgen Akademiiaǵa jáne onyń ujymyna úlken alǵys aitamyz», - degen Senat Tóraǵasy bul jumys ári qarai da tabysty jalǵasatynyna senim bildirdi.
«Jalpy, ulttyq qundylyqtardy dáripteý, ulttyq sanany jańǵyrtý Senat jumysynyń da negizgi basymdyqtarynyń biri. Qazirgi tańda ulttyq biregeilikti nyǵaitý, ulttyq kodty saqtaý asa mańyzdy. Osy baǵytta parlamenttik tyńdaýlar, dóńgelek ústelder taǵy da basqa is-sharalardy turaqty ótkizip kelemiz.
Senatorlar ózderiniń depýtattyq saýaldary arqyly da bul saladaǵy biraz máseleni kóterip júr.
Senatorlardyń birqatar usynystary «Ulttyq rýhani jańǵyrý» ulttyq jobasyn ázirleý barysynda da eskerildi. Aldaǵy ýaqytta osy baǵyttaǵy jumystar jalǵasa beredi», - dedi Máýlen Áshimbaev.
