Búgin Parlamenttiń altynshy shaqyrylymynyń besinshi sessiiasy aiaqtaldy. Osyǵan orai Senat Tóraǵasy Máýlen Áshimbaev Facebook paraqshasynda atqarylǵan jumystar jóninde málimdedi, dep habarlaidy "Ult aqparat".
Senat tóraǵasynyń aitýynsha, bul sessiiada depýtattar aýqymdy jumys atqaryp, 98 zań qabyldaǵan.
«Onyń árqaisysy muqiiat qaralyp, jan-jaqty talqylanyp, pysyqtaldy. Pandemiia kezinde depýtattyq korpýs Memleket basshysynyń halyqty áleýmettik qoldaýǵa jáne daǵdarystyń saldaryn joiýǵa arnalǵan bastamalaryn zańnamalyq turǵydan qamtamasyz etti. Parlament Ekonomikalyq ósimdi qalpyna keltirý jónindegi keshendi jospar aiasynda birqatar zańǵa engizilgen tolyqtyrýlardy qabyldady. Olar eńbekaqy tóleý qorynan ustalatyn salyqtan jáne áleýmettik tólemderden bosatýǵa, sondai-aq, múlikke, kólikke jáne jerge salynatyn salyqtar boiynsha azamattardyń aiyppuldary men ósimpuldaryn keshirýge arnalǵan. Odan bólek, halyq pen biznesti qoldaý maqsatymen qolǵa alynǵan basqa da sharalar bar», – deidi Senat tóraǵasy.
Sonymen qatar Máýlen Áshimbaev Memleket basshysynyń saiasi reformalary da zańmen bekitilgenine nazar aýdarǵan.
«Sonyń aiasynda saiasi partiialardy tirkeý úshin qajetti músheler sany eki esege qysqardy. Parlamenttik oppozitsiia institýty qalyptasýda. Partiialyq sailaý tizimderine áielder men jastar úshin 30 paiyzdyq mindetti kvota engizildi. Beibit jinalystar men mitingter ótkizý úshin eskertý tártibi bekitildi jáne jala jabý týraly bap qylmystyq kodeksten alyndy. Qoǵamǵa qaýip tóndiretin aýyr qylmystar – pedofilder, esirtki satý, adam saýdasy, áielder men balalarǵa qatysty zorlyq jáne brakonerlik úshin jaza kúsheitildi», – dedi Máýlen Áshimbaev.
Sondai-aq, Senat tóraǵasy ustazdardyń júktemesin azaitýǵa jáne olardy áleýmettik qorǵalýyna múmkindik beretin «Pedagog týraly» jańa Zań qabyldanǵanyn aityp, bul qujat muǵalimder úshin, sonyń ishinde aýyldyq jerlerdegi mamandarǵa arnalǵan jańa áleýmettik kepildikter men yntalandyrý tetikterin qarastyratynyn jetkizgen.
Qabyldanǵan Ákimshilik protsestik kodeks bilik organdary men azamattardyń arasynda týyndaǵan daýlardy qaraý kezinde azamattardyń quqyǵyn qorǵaý mehanizmin bekitedi. Kodeks memlekettik organdardyń jaýapkershiligin arttyryp, azamattar men memlekettiń arasyndaǵy konstrýktivti dialogtyń nyǵaia túsýine múmkindik beredi. Bul «Halyq únine qulaq asatyn memleket» qaǵidasymen úndesedi.
«Aldaǵy ailarda depýtattar óńirlerge baryp, halyqpen kezdesedi. Kezdesýlerdiń formaty men kestesi elimizdegi jáne jekelegen eldi mekenderdegi epidemiialyq jaǵdailarǵa bailanysty bolady. Parlament depýtattary aldaǵy ýaqytta Elbasy saiasatynyń sabaqtastyǵyn saqtaýǵa jáne Memleket basshysynyń eldi jańǵyrtý baǵdaryn iske asyrýǵa baǵyttalǵan zańdardy ýaqtyly jáne jedel qabyldaý jolyndaǵy belsendi jumysyn jalǵastyra beredi» delingen M. Áshimbaevtyń jazbasynda.
