Aqmola oblysyna sapary barysynda «Nur Otan» partiiasy Tóraǵasynyń birinshi orynbasary Máýlen Áshimbaev Kókshetaý qalasyndaǵy sý basqan «Privokzalnyi» shaǵyn aýdanynyń turǵyndarymen kezdesti, dep habarlaidy "Ult aqparat".
Partiianyń Feisbýktegi paraqshasynda jariialanǵan aqparatqa sensek, atalǵan máselege bailanysty Máýlen Áshimbaev partiianyń jergilikti filialyna tótenshe jaǵdaimen kúres jumystaryn baqylaýda ustap, zardap shekken ár azamattyń memleket tarapynan beriletin mindetti kómekti alýyn qamtamasyz etýdi tapsyrdy.
«Elbasy, partiia Tóraǵasynyń aldymyzǵa qoiyp otyrǵan eń basty mindetteriniń biri - halyqty alańdatqan kez kelgen máseleni oń sheshýge yqpal etý. Sondyqtan sý tasqyny siiaqty aityp kelmeitin apattan zardap shekken azamattarǵa qoldaý kórsetý - partiia jumysyndaǵy basymdyqtardyń biri. Mundai máseleni qaita boldyrmas úshin aldyn alý jumystaryn kúsheitip, basty sebebimen kúresýimiz kerek. Sondyqtan, partiia oblys basshylyǵynyń osy baǵyttaǵy jumystaryn tikelei óz baqylaýynda ustaidy», - dedi Máýlen Áshimbaev.
Aita keteiik, 2 sáýir kúni Aqmola oblysynda Qypshaqty ózeninde sý deńgeii kóterilip, tótenshe jaǵdai saldarynan Kókshetaý qalasyndaǵy bes turǵyn úi men 15 aýla sý astynda qaldy. Óńir basshylyǵynyń málimetine súiensek, qazirgi tańda oblys ortalyǵynda tasqyn sý máselesi birqalypty. Tótenshe jaǵdaimen kúresý úshin arnaiy tehnikalar men jeke quramnyń 80 adamy jumyldyrylyp, apattyń saldaryn joiý jumystary qarqyndy júrip jatyr.
