Nur-Sultan qalasy máslihatynyń kezekti sessiiasynda depýtat Vladislav Sergeev jetim balalardy jumyspen qamtý jáne turǵylyqty jerin úilestiretin organdy anyqtaýdy usyndy, dep habarlaidy "Ult aqparat".
«Jetim bala internatta turǵan kezde, kolledj ben joǵary oqý ornynda oqyǵan kezde kóp jumys atqarylatynyn bilemiz. Ol kezde olar baspanamen de, azyq-túlikpen de qamtamasyz etiledi. Barlyq qiyndyq ataýly oqý bitirgennen keiin bastalady. Birinshiden, baspana tabý, ekinshiden, azyq-túlik, úshinshiden jumysqa turý máselesine tap bolady. Bul máseleni talqylaǵan kezde qansha jetim jumysqa ornalasqany, kim qandai jaǵdaida turyp jatqany týraly málimet joq ekenine kóz jetkizdik. Eń alys týystyń ózi stýdentti qamqorlyǵyna ala alady. Bizdegi mentalitet solai, al jetim balalarda ondai qol ushyn sozatyn týysy joq. Sondyqtan olardyń joǵary oqý ornynan keiingi taǵdyryn baqylap, jumysqa ornalasý, baspanaly bolý máselesin úilestiretin organdy anyqtaýdy suraimyn. Múmkin olar baspana alǵanǵa deiin internatta nemese oqyǵan mekemede tirkelip turýy kerek shyǵar?», - deidi máslihat depýtaty Vladislav Sergeev.
Qala ákiminiń orynbasary Nurlan Nurkenov bul másele qarastyrylyp, nátijesi belgili bolǵan kezde aitylatynyn aitty.
«Bul rasymen ózekti másele. Eń aldymen baspana máselesin, odan keiin jumysqa ornalastyrý máselesin sheshý kerek. Osy másele boiynsha saraptama jumysyn júrgizip, qai másele ózektirek ekenin anyqtaýymyz kerek. Saraptamalyq jumys júrgizýge qatysty birqatar suraq bar. Osyǵan bailanysty byltyr qala ákiminiń tapsyrmasy boiynsha halyqtyń áleýmettik osal tobymen, atap aitqandajetim balalarmen, múgedek balalarmen tyǵyz jumys isteýdemiz. Sizdiń usynysyńyzdy qabyldadyq, nátijesin aitamyz», - deidi Nurlan Nurkenov.
