Resei 24 aqpanda Ýkrainaǵa basyp kirý arqyly "eskertý soqqysyn berdi", "jalǵyz durys sheshim osy edi". Máskeýdegi Qyzyl alańda ótken áskeri paradta sóz sóilegen Resei prezidenti Vladimir Pýtin osylai dep málimdedi. Bul týraly Azattyq radiosy habarlady.
77 jyl buryn 9 mamyrda natsistik Germaniianyń Ekinshi dúniejúzilik soǵysta jeńilgeni habarlanǵan. Reseimen qosa KSRO quramynda bolǵan biraz el búgin Jeńis kúnin toilap jatyr.
Biyl bul data Ýkrainadaǵy "áskeri operatsiiamen" qatar keldi. Resei basshylyǵy Ýkrainaǵa shabýylyn osylai ataidy, al ony "soǵys" dep ataǵandardy qatań jaýapqa tartady. Pýtinniń aitýynsha, AQSh pen NATO elderi Reseige qaýipsizdik kepildigin berýden bas tartty jáne Ýkrainany Reseidiń "tarihi jerine", sonyń ishinde Qyrymǵa shabýyl jasaýǵa daiyndady. Shabýyldy bastaýǵa osy jaittar sebep boldy deidi Resei basshysy.
Dástúr boiynsha bir minýt únsizdik jariialaǵan Pýtin tek sovet kezinde soǵysqa qatysyp, qaza tapqandardy ǵana emes, "neonatsister atqylaǵan" Odessadaǵy kásipodaq úiinde kóz jumǵandardy jáne Ýkrainada oqqa ushqan Resei soldattaryn eske alýǵa shaqyrdy. Buǵan qosa ol qaza tapqandar men jaralanǵandardyń otbasyna kómek kórsetý jóninde jarlyqqa qol qoiǵanyn aitty.
Jeńis kúni qarsańynda britandyq jáne amerikalyq aqparat quraldary barlaý qyzmetindegi derekkózderge súienip, Pýtin meiram kúni Ýkrainaǵa soǵys jariialaýy ne mobilizatsiia týraly málimdeýi múmkin ekenin jazǵan. Resei prezidenti mundai eshteńe aitqan joq.
Minbede Úkimet basshysy Mihail Mishýstin, Qaýipsizdik keńesindegi Pýtinniń orynbasary Dmitrii Medvedev, patriarh Kirill jáne basqalar turdy.
Áskeri paradty qorǵanys ministri Sergei Shoigý basqardy. Aýa raiynyń qolaisyzdyǵyna bailanysty áýedegi ushaqtar sherýi ótpei qalǵan.
Buǵan qosa, búgin Reseidiń kóp qalasynda "Bessmertnyi polk" sherýi ótip jatyr. Koronavirýs infektsiiasy taralýyna bailanysty sońǵy birneshe jylda bul sherý onlain formatqa aýysqan. Jurt soǵysta qaza tapqan azamattardyń sýretterin ustap, túrli uran kóterip, sherý jasaidy. Qatysýshylar Sovet odaǵynyń týyn, simvoldaryn kóterip, áskeri kiimderin kiedi. Uiymdastyrýshylar Ýkrainada qaza bolǵan soldattardyń sýretin kóterip shyǵýǵa da ruqsat bergen.
Reseidiń kei aýdandarynda "Bessmertnyi polk" sherýine soǵysqa qarsy uran ustap shyqqandardy qamady degen de aqparat bar. "Vesna" qozǵalysy Jeńis kúni osylai qarsylyq bildirýge shaqyrǵan. Uiymnyń Peterbýrgtegi jáne basqa qalalardaǵy birneshe belsendisi osyndai uran tastaǵany úshin qamaýǵa alynǵan.
