Máskeý qalalyq Tagan aýdandyq soty 31 qańtarda qazaqstandyq eks-bankir Muhtar Ábiliazovqa qatysty qylmystyq is materialdaryn qaraidy, dep habarlaidy QazAqparat.
mos-gursud.ru portalynyń málimetinshe, RF Qylmystyq kodeksiniń 159-baby 4-bóligi («Alaiaqtyq») boiynsha M.Ábiliazovty jáne taǵy tórt azamat - A.V.Ereshenko, I.V.Kononko, T.N. Paraskevich jáne A.A Ýdovenkony aiyptaý boiynsha qylmystyq is ótken jyldyń jeltoqsanynda sotqa túsken.
Osy aralyqta eki sot otyrysy qorǵaýshylardyń kelmeýine bailanysty keiinge (2019 jyldyń 24 jeltoqsany jáne 2020 jyldyń 17 qańtary) qaldyryldy. Kelesi otyrys jumaǵa, 31 qańtarǵa belgilendi.
Resei Federatsiiasynyń QK 159-baby 4-bóligi boiynsha («Uiymdasqan toptyń asa iri mólsherde alaiaqtyq jasaýy nemese azamattyń turǵyn úi-jai quqyǵynan aiyrýǵa ákep soqqan alaiaqtyq») kináliler on jylǵa deiin bas bostandyǵynan aiyrylyp, bir million rýblge deiin aiyppul tóleidi.
Bul áreket asa iri qylmysqa jatady, sondyqtan is aiyptalýshylardyń qatysýynsyz qarala bermek. Advokattardyń únemi kelmei qalýy da sot protsesin soza berýge negiz bolmaidy, óitkeni RF Qylmystyq is júrgizý kodeksine sáikes, «sottalýshynyń shaqyrǵan qorǵaýshysy bolmaǵan jaǵdaida sot qorǵaýshyny taǵaiyndaý boiynsha sharalar qabyldaidy». Osylaisha, aiyptalýshylarǵa qatysty úkim olardyń qatysýynsyz shyǵarylýy múmkin.
