Foto: Májilistiń baspasóz qyzmetinen
Depýtat Daniiar Qasqaraýov búgin ótken Májilis otyrysynda premer-ministrge saýal joldap, Almatynyń irgesindegi aýyldardyń máselesin kóterdi. Sonyń ishinde Qarasai aýdanyna qarasty Kemertoǵan eldimekeniniń infraqurylymy múshkil kúide ekenin aityp, birqatar talaptar qoidy dep habarlaidy "Ult Aqparat".
Depýtattyq saýaldyń tolyq nusqasy:
Qurmetti Oljas Abaiuly!
Prezidenttiń mańyzdy sheshimimen elimizde jańa úsh oblys paida boldy. Onyń ishinde Almaty oblysy ekige bólindi. Bizdiń oblysta arnaiy Alataý qalasy boi kóterdi. Bul bizdiń óńir úshin Prezident tarapynan edáýir qoldaý.
Degenmen, áli de óńirimizdiń aýdandaryndaǵy infraqurylym máseleleri sheshimimin tappai otyr. Mysaly, shalǵaidaǵy aýdandaryda aitpaǵanda, Almaty qalasynyń irgesinde turǵan atyshýly Qarasai aýdanynyń problemalalary shash etekten.
Al ol máselelerdi sheshýge ne oblys, ne aýdan, ne aýyl ákimderi qulyqty emes. Árbir máselege tek sydyrma jaýap qaitarýmen shektelip keledi.
Mysaly, sol jerdegi Kemertoǵan aýylynyń áleýmettik máselesi ýshyǵyp tur. Jaryq, jol jáne sýǵa jarymaǵan jurttyń tózimi ábden taýsylǵan. Kemertoǵan aýylynda 160-tan astam toq podstantsiiasy bar eken.
Onyń barlyǵy jekemenshiktiń qolynda. Jer alyp, úi salǵan halyq elektr energiiasyn qosý úshin 300-500 myń teńge tóleýge májbúr. Biraq tehnikalyq talaptarǵa sai kelmeitin jeliler jii úzilip, turǵyndardyń turmystyq tehnikalary kúiip jaramsyz bolýda. Bul másele boiynsha Prokýratýranyń ózi ártúrli zańsyzdyqtarǵa qaramastan, naqty zańdy sheshim shyǵara almady. Depýtattardyń hatyna nátijeli jaýap bolmady.
Kelesi másele, Kemertoǵandaǵy kóshelerdiń tozyǵy jetken, múldem jol joq dep aitsa bolady. Keibir kósheler jekemenshiktiń qolynda. Máselen Jasqyran, Shapaǵat kóshelerindegi turǵyndar óz úilerine kóshe arqyly kirip shyǵa almaidy. Sebebi kóshe túsýi tiis telimder jekeniń qolynda. Jergilikti avtokólik joldary, óndiristik aimaqtardyń jerleri bóten bireýlerdiń jer ýchaskesi bolyp ketken.
Oǵan qosa, Qarasai aýdanyndaǵy jer máselesi de ýshyǵyp tur. Ókinishtisi, sý qorǵaý beldeýleriniń aýmaǵynda jappai qurylys oryn alýda, Ile-Alataýy ulttyq saiabaǵynyń qorǵaý aimaǵynda, múrdelerdiń sanitarlyq qorǵaý aimaǵynda turǵyn úiler soǵylýda. Rekreatsiialyq aimaqtar qysqarǵan.
Bul tikelei aýdan ákiminiń jaýapkershiligi. Megapolistiń irgesinde turǵan aýyl turǵyndarynyń problemalaryn sheshýge óńirdiń eshbir ákimi qulyqty emes.
Sondyqtan Qarasai aýdanyndaǵy kúrmeýi kóp máseleni sheshý úshin tómendegidei talaptarymyz bar:
Birinshiden, Bas Prokýratýradan - elektr jabdyqtaý uiymynyń 2021-2023 jyldardaǵy sharýashylyq qyzmetin prokýrorlyq tekserýdi;
Ekinshiden, Aýyl sharýshylyǵy ministrligine aýdan boiynsha jekemenshikke berilgen jerlerdiń zańdylyǵyn qaita qaraýdy.
Úshinshiden, Jer kodeksine jáne basqa da zań aktilerine sáikestigin jáne zańdylyǵyn anyqtaý maqsatynda inspektorlyq tekseristi ashýdy talap etemin.
Sondai-aq, atalǵan depýtattyq saýal resmi Bas prokýratýra men Jer resýrstaryn basqarý Komitetine joldanǵan aryz dep qosa eseptelsin.
Qurmetpen, depýtat Qasqaraýov.
