Kólik politseileri «Taraz—Nur-Sultan» baǵytyndaǵy áýe reisiniń jolaýshysyn quqyq buzǵany úshin ákimshilik jaýapkershilikke tartty, dep habarlaidy "Ult aqparat".
Aǵymdaǵy jyldyń 8 sáýirinde saǵat 15.30-da «Taraz—Nur-Sultan» baǵytyndaǵy ushaq Tarazdan ushyp shyǵyp, bir saǵattan keiin áýe bortynda destrýktivti jolaýshynyń bolýyna bailanysty áýejaiǵa keri oraldy. Qaita qonǵan soń, quqyqbuzýshy áýe kemesi komandiriniń aktisimen Taraz qalasynyń áýejaiyndaǵy Jelilik politsiia bólimshesiniń qyzmetkerlerine tabystaldy. Budan soń, ushaq mejeli jerine ushyp ketti.
Kóliktegi politsiia departamentiniń baspasóz qyzmetiniń habarlaýynsha, tekserý barysynda kólik politseileri 56 jastaǵy Jambyl oblysynyń turǵynyn anyqtady. Ol ushaq bortynda masań kúide bolyp, ózin dóreki ustap, qoǵamdyq orynda balaǵat sózder aityp, ekipaj ben áýe kemesi komandiriniń birneshe ret eskertken talaptaryna baǵynbaǵan.
Meditsinalyq kýálandyrý qorytyndysyna sáikes er adamnyń ortasha dárejedegi alkogoldik masań kúide bolǵandyǵy anyqtaldy.
Oǵan qatysty QR ÁQBtK-niń 434-babynyń 1-bóligimen, iaǵni usaq buzaqylyq, QR ÁQBtK-niń 440-babynyń 1-bóligimen, iaǵni alkogoldik ishimdikter ishý jáne qoǵamdyq oryndarda masań kúide bolý jáne QR ÁQBtK-niń 566-babynyń 1-bóligimen, iaǵni áýe kemesinde minez-qulyq qaǵidalaryn buzý boiynsha birden úsh ákimshilik hattama toltyrylyp, 13 AEK mólsherinde aiyppul salyndy.
Sondai-aq, atalǵan áýe reisiniń 1968 jyly týǵan áiel-jolaýshysyna da qatysty QR ÁQBtK-niń 434-babynyń 1-bóligimen, iaǵni usaq buzaqylyq jáne QR ÁQBtK-niń 566-babynyń 1-bóligimen, iaǵni áýe kemesinde minez-qulyq qaǵidalaryn buzý boiynsha ákimshilik hattamalar toltyrylyp, oǵan 3 AEK mólsherinde aiyppul salyndy.
Usaq buzaqylyq boiynsha jasalǵan materialdar tiisti sheshim qabyldaý úshin Taraz qalasynyń mamandandyrylǵan aýdanaralyq ákimshilik sotyna joldandy.
