Elorda áýejaiynda politsiia qyzmetkerleri Túrkistan oblysynyń turǵynyn QR Ákimshilik quqyq buzýshylyq týraly kodeksiniń birden úsh baby boiynsha jaýapkershilikke tartty, dep habarlaidy "Ult aqparat" Nur-Sultan qalasy Kóliktegi politsiia departamentiniń baspasóz qyzmetine silteme jasap.
28 naýryzda Nur-Sultan qalasy áýejaiyndaǵy jelilik politsiia bólimine áýejai qyzmetkeri telefon shalyp, bir er adamnyń aqparat biýrosynyń qasynda qoǵamdyq tártipti buzyp turǵany týraly habarlaǵan. Ol Túrkistan oblysynyń 26 jastaǵy turǵyny bolyp shyqty. Tekseris júrgizgen Kóliktegi politseiler tártip buzýshynyń qoǵamdyq orynda mas kúide bolǵany, dórekilik tanytyp, elektrondyq temeki shegip turǵanyn jáne ózine jasalǵan eskertýge mán bermei turǵanyn anyqtady. Er adam sondai-aq quqyqqorǵaý organy qyzmetkeriniń talabyna baǵynbady.
Meditsinalyq kýálandyrý qorytyndysyna sáikes, onyń ortasha dárejede mas kúide bolǵany anyqtaldy.
Ustalǵan azamatqa qatysty QR Ákimshilik quqyq buzýshylyq týraly kodeksiniń 440-baby 1-bólimi, 441-baby 1-bólimi jáne 667-baby 1-bólimi boiynsha birden úsh ákimshilik material toltyrylǵan. Oǵan 20 AEK kóleminde aiyppul salyndy.
Tártip saqshysynyń zańdy talabyna baǵynbaýǵa qatysty material protsessýaldyq sheshim qabyldaý úshin Nur-Sultan qalasynyń mamandandyrylǵan aýdanaralyq ákimshilik sotyna joldandy.
