Ishimdik iship alyp qyzmettik kólik júrgizgen Taldyqorǵan ákimdiginiń qurylys bóliminiń basshysy jumystan qýyldy. Sondai-aq qala ákiminiń orynbasary Sáýle Arzanbekova «qatań sógis» aldy, dep habarlaidy QazAqparat tilshisi.
Esterińizge sala keteiik, Taldyqorǵan qalalyq qurylys bóliminiń basshysy kósheniń qaq ortasynda áielin uryp, videoǵa túsip qalǵan bolatyn. Sheneýnik ishimdik ishken kúiinde qyzmettik kólikti júrgizip, politseilerge ustalǵan. Artynan belgili bolǵandai, qalalyq ákimdiktiń birneshe qyzmetkeri bas qosyp, qoǵamdyq oryndardyń birinde otyrǵan. Arty daýǵa ulasty. 13 naýryz kúni túngi 24:00 – 01.00 shamasynda túsirilgen video boiynsha qyzmettik tekserý júrigizip, qorytyndysy jariialandy.
«Taldyqorǵan qalasy ákiminiń orynbasary S.A.Arzanbekovaǵa ózine júktelgen fýnktsionaldyq mindetterdi tiisinshe oryndamaǵany úshin «qatań sógis» túrindegi tártiptik jaza qoldanyldy. «Taldyqorǵan qalasynyń qurylys bólimi» MM-niń basshysy M.A.Nurǵalievti jumystan bosatyldy. «Taldyqorǵan qalasynyń kásipkerlik bólimi» MM-niń basshysy N.A. Qaliahmetovke ózine júktelgen fýnktsionaldyq mindetterdi tiisinshe oryndamaǵany úshin «qyzmetke tolyq sáikes emestigi» túrindegi tártiptik jaza, «Taldyqorǵan qalasynyń ekonomika jáne biýdjettik josparlaý bólimi» MM-niń basshysynyń orynbasary A.S. Penge tártiptik jaza qoldanyldy», - delingen Taldyqorǵan qalalyq ákiminiń baspasóz qyzmeti taratqan habarlamada.
