Elordanyń áýejaiynda kóliktegi politsiia qyzmetkerleri ákimshilik quqyqbuzýshylyq jasaǵan 43 jastaǵy er adamǵa aiyppul saldy, dep habarlaidy "Ult aqparat".
Kóliktegi politsiia qyzmetkerleri er adamdy Ákimshilik kodekstiń bir emes, úsh baby boiynsha ákimshilik jaýapqa tartqan. Atap aitqanda er adam elektrondy temeki shegip, qoǵamdyq orynda mas bolǵany, sonymen qatar usaq buzaqylyǵy úshin aiypty bolyp, 55 AEK aiyppulǵa ilikken.
Kóliktegi politsiia departamentiniń bastyǵy Qalihan Qobylandinniń aitýynsha 3 qazanda Nur-Sultan qalasynyń áýejaiyndaǵy Jelilik politsiia bólimine «Skat» áýe kompaniiasynyń ókili habarlasyp, «Nur-Sultan – Aqtaý» baǵytyndaǵy ushaqta mas jolaýshynyń júrgenin aitqan.
«Tekserý barysynda Mańǵystaý oblysynyń 43 jastaǵy turǵyny mas kúide áýe kemesiniń salonynda temeki shegip, boqtap sóilegeni, tipti atalǵan áýe kompaniianyń qyzmetkerlerimen tóbeleskeni anyqtaldy. Ushaq qonǵannan keiin er adam politsiia tapsyryldy», - dep atap ótti politsiia polkovnigi.
Oǵan qatysty is Aqtaý qalasynyń mamandandyrylǵan ákimshilik sotyna jóneltilgen.
Kóliktegi politsiia departamenti jyl basynan beri ártúrli deńgeidegi ákimshilik quqyqbuzýshylyqtar úshin 32 498 adam jaýapqa tartylǵanyn habarlaidy.
