QR Ádilet ministri Marat Beketaev «El tiregi» bastamashyl tobynyń nege tirkeýden óte almai júrgenin aitty, dep habarlaidy QazAqparat.
«Nelikten? Sebebi onyń negizgi uiymdastyrýshysy – Nurjan Áltaev. Ol birneshe ret túrli alańdarda, túrli forýmdarda ózderin tirkeýden negizsiz bas tartylǵanyn málimdedi. Munda eki máseleni atap ótý kerek. Qujattaryn qaita-qaita usynǵanymen, is júzinde ózgertilmegen. Qaita-qaita bir jiyntyqty ákele beredi. Biz anyqtap kórsetken kemshilikterdi túzetpesten 16 ret usyndy. «Nege olai istep júr?» degen suraq týyndaidy. Múmkin, tirkeýden óte almai júrgen saiasi qurbannyń beinesin jasaý áreketi baiqalatyn shyǵar. Qujattaryn ózgertpesten ákele bergendikten, biz ony tirkeýden bas tartatynymyzdy málimdeýge májbúrmiz», - dedi Marat Beketaev.
Ministr Nurjan Áltaevti jeke qabyldaǵanyn da aitty.
«Jeke qabyldaýǵa kelgende taǵy sol shaǵymyn aitty. Men oǵan qujattaryn retke keltirý kerek ekenin aityp, adamsha keńes berdim. Onyń is-áreketine baǵa bereiin dep otyrǵan joqpyn, keibir faktilerdi aitaiyn. Nurjan Áltaev birneshe ret aliment boiynsha boryshker bolǵan. Birneshe ret ol boryshyn sot oryndaýshy habarlaǵanda ǵana tóledi. Sońǵy ret jazda osyndai oqiǵa boldy – shamamen 2 mln teńge tóledi. Aliment keshiktirilip ótelgendikten, ákimshilik aiyppul da tóledi. Osymen toqtaiyn», - dedi ministr.
