QR Sybailas jemqoryqqa qarsy is-qimyl agenttigi Bas prokýratýranyń Almaty oblysy ákiminiń orynbasary Baǵdat Manzorovqa qatysty qylmystyq isti jabý sheshimine narazylyq tanytty. Bul týraly atalǵan agenttiktiń 1-departamentiniń basshysy Qanat Súleimenov aitty, dep habarlaidy "Ult aqparat".
«Faktilerge súienýimiz kerek. Bizge agenttikke eki azamatymyz júgindi. Olardyń shaǵymdaryn sotqa deiingi tergeýdiń biryńǵai tizilimine tirkep, tergeýdi bastadyq. Bul - birinshi fakti. Ekinshi fakti, qylmystyq isti tergeý barysynda Bas prokýratýra talap etti jáne qylmys iziniń bolmaǵany úshin toqtatty. Qazirgi ýaqytta biz bul sheshimmen kelispeitindigimizdi jáne oǵan qarsylyq bildirdik. Qazir ol Bas prokýrordyń qaraýynda jatyr, - dedi Súleimenov agenttiktiń alqa májilisi aiasynda BAQ ókilderine bergen suhbatynda.
Osy oraida ol tergeýdiń mán-jaiy qupiia ekendigin, ony prokýratýra organdarynyń kelisimimen ǵana jariialaýǵa bolatyndyǵyn aitty. Sonymen qatar, departament basshysy Bas prokýror tarapynan agenttikke zańdylyqty buzýǵa jol bergen qyzmetkerlerdi tártiptik jaýapkershilikke tartý týraly usynym túskendigin rastady.
«Bizge usynym tústi. Bul usynymdy basshylyq qaraidy jáne onyń qanshalyqty negizgi ekendigin jáne kimniń tártiptik jaýapkershilikke tartylatyndyǵyn sheshedi» dedi Q.Súleimenov.
Eske salsaq, Almaty oblysy ákiminiń orynbasary Baǵdat Manzorov ustalǵany týraly buǵan deiin habarlaǵan bolatynbyz. Sondai-aq, Agenttik oǵan qandai aiyp taǵylǵanyn aitty. Bas prokýratýra Baǵdat Manzorovqa qatysty qylmystyq is toqtatylǵanyn resmi túrde málimdedi. Sheneýnik qyzmetine oraldy.
