Mańǵystaý oblysyndaǵy Beineý jáne Mańǵystaý aýdandarynyń aýmaǵynda ornalasqan Tepke ýchaskesinen TZ-birinshi barlaý uńǵymasynan munai burqaǵy atqylady, dep habarlaidy "Ult aqparat" Mańǵystaý oblysy ákiminiń baspasóz qyzmetine silteme jasap.
Alynǵan synamalar boiynsha munai sapasy óte joǵary, jeńil, kúkirti joq.
Bul qýanyshty habardy oblys ákimi S.Trumovpen kezdesken Meridian Petroleým kompaniiasynyń prezidenti B. Qýandyqov jetkizdi. Onyń aitýynsha, Tepkedegi ken orny - elimiz táýelsizdigin alǵaly 30 jylda Mańǵystaý oblysynda ashylǵan alǵashqy eń irisi bolmaq.
«2018 jyly bastalǵan geologiialyq barlaý jumysy nátijesin berdi. Alynǵan munaidyń qysymy, debiti, gazdyq faktory jáne basqa da parametrleri boiynsha iri ken orny bolady dep josparlap otyrmyz. Qazir kenornyndaǵy munai qoryn anyqtaý jumystary júrip jatyr. Jańa kenishtiń ainalasynda «Qaraqudyq», «Arystan» jáne «Komsomolskoe» ken oryndary ornalasqan»,-dedi Meridian Petroleým kompaniiasynyń prezidenti B. Qýandyqov.
Jańa ken ornyna aty ańyzǵa ainalǵan geolog-barlaýshy, Mańǵystaýdaǵy barlyq kenishti ashýǵa atsalysqan Halel Ózbekqalievtiń esimi berildi.
