Mańǵystaýda itbalyqty qorlaǵandar qylmystyq jaýapkershilikke tartyldy. Bul týraly QR Ekologiia, geologiia jáne tabiǵi resýrstar ministrligi Orman sharýashylyǵy jáne janýarlar álemi komitetiniń baspasóz hatshysy Sáken Dildahmet málim etti, dep habarlaidy "Ult aqparat".
«2020 jyldyń 6 shildesinde Mańǵystaý oblysy orman sharýashylyǵy jáne janýarlar álemi aýmaqtyq inspektsiiasy belgisiz adamdardyń itbalyqty qorlaý faktisi boiynsha Mańǵystaý oblysy Qaraqiia aýdany politsiia bólimine shaǵym túsirgen. Politsiia bólimi atalǵan fakti boiynsha QR QK 316-baby 2-bóligine (Janýarlarǵa qatygezdik jasaý) sáikes olardyń jeke basyn anyqtap, qylmystyq is qozǵady», - dep jazdy Sáken Dildahmet Facebook-tegi paraqshasynda.
Qazirgi ýaqytta kúdiktilerge qatysty sotqa deiingi tergeý jumystary bastalǵan.
«Dostar! Jabaiy janýarlarmen kezdesip qalsańyzdar qashyqtyq saqtańyzdar jáne abai bolyńyzdar», - dedi Sáken Dildahmet.
