Foto: gov.kz
Mańǵystaý oblysynyń Beineý aýdanyndaǵy jer úide qoldan jasalǵan jylytý qazandyǵynda gaz jaryldy, - dep habarlaidy «Ult aqparat» «QazTransGaz Aimaq» AQ-nyń Qoǵammen bailanys departamentine silteme jasap.
Tótenshe oqiǵa aýdan ortalyǵynda 3 sáýir kúni túnde tirkelip, bir adam qaitys boldy.
«Jarylys saldarynan jekemenshik úi tolyǵymen qirap, Beineý aýylynyń turǵyny aýrýhanada kóz jumdy. Qaiǵyly oqiǵa tańǵa jýyq boldy. Bul týraly «KazTransGaz Aimaq» AQ apattyq brigadasyna tótenshe jaǵdai qyzmetkeri habarlaǵan. Oqiǵa ornyna jetken mamandar úide qoldan jasalǵan gaz peshi ornatylǵanyn anyqtady. Apat týraly aýdandyq ákimdik pen politsiiaǵa birden habar berildi. Aldyn ala málimetter boiynsha, aýaǵa gaz tarap, bólme ishine tolǵan. Úide ornatylǵan qoldan jasalǵan gaz qazandyǵyna qatysty tekserýshi RTsKÝ mekemesi buryn osy jabdyqty aýystyrý týraly eskertý bergen eken. Biraq úi ieleri ol eskertýdi elemegenge uqsaidy. Qaiǵyly oqiǵa sebepteri tekseris qorytyndysy boiynsha anyqtalady», - delingen departament taratqan málimette.
Buǵan deiin Mańǵystaý oblysynda gaz qubyry jelisinde órt shyǵyp, jarylys bolǵan edi.
Beineý aýdanynda «Ortalyq Aziia – Orta magistraldy gaz qubyry» jelisinde jarylys oqiǵasynyń sebebi aityldy.
