Mańǵystaý oblysynda bank qyzmetkeri klientterdiń shotynan 90 mln teńge jymqyryp, onyń bir bóligin býkmekerlik keńse arqyly qolma-qol aqshaǵa ainaldyryp, shyǵaryp alǵan.
Bul týraly QR Qarjylyq monitoring agenttiginiń baspasóz qyzmeti málimet taratty.
«Býkmekerlik keńseler – kez-kelgen kásipkerlik qyzmet siiaqty biznestiń bir túri. Olardyń Qazaqstandaǵy qyzmeti «Oiyn biznesi týraly» Zańmen retteledi. Sonymen qatar, zańsyz onlain-kazinolardyń jumysy, býkmekerlik keńselerdiń ashyq qarjy aǵyndary qylmystyq kiristerdi jylystatý táýekelin týdyrady. Býkmekerlik keńselerdiń qyzmeti ýákiletti organdardyń baqylaýynda, olar býkmekerlik keńseler arqyly qylmystyq kiristerdi qolma-qol aqshaǵa ainaldyrý shemalaryn jii anyqtaidy», - dep jazady agenttiktiń baspasóz qyzmeti.
Sondai shemanyń birin Mańǵystaý oblysyndaǵy banktiń qyzmetkeri paidalanyp, sottalǵan eken.
«2020 jyly Mańǵystaýda bank qyzmetkeri klientterdiń shotynan 90 mln teńgeden astam qarajat urlap, onyń bir bóligin býkmekerlik keńse arqyly qolma-qol aqshaǵa ainaldyrǵan. Sot ony 5 jylǵa bas bostandyǵynan aiyrdy», - dep jazylǵan resmi málimette.
Agenttik ókilderi Qazaqstan aýmaǵynda onlain-kazinolardyń qyzmetine «Oiyn biznesi týraly» Zań boiynsha tyiym salynǵanyn eske salady.
«Býkmekerlik keńselerdiń jekelegen qyzmetkerleri ońai paida tabý úshin zańnyń talaptaryn elemeidi jáne klientterdi zańsyz onlain-kazino men totalizatorlarǵa tartady. Mysaly, Almatyda zańsyz oiyn biznesin uiymdastyrǵan PariMatch, VK Triumph, «Favorit» jáne PROFITBetting býkmekerlik keńseleriniń laýazymdy tulǵalary sottaldy. Sot olardy ártúrli jazalaý sharalaryna úkim shyǵardy», - dep jazady agenttiktiń baspasóz qyzmeti.
