Búgin Májilistegi parlamenttik tyńdaýda Indýstriia jáne infraqurylymdyq damý ministri Qaiyrbek Óskenbaev Mańǵystaý oblysyn aýyz sýmen qamtamasyz etýdegi máseleni aitty, dep habarlaidy QazAqparat.
«Halyqty aýyz sýmen qamtamasyz etýde óz sheshimin talap etetin birqatar problemalar bar. Aýyldardy aýyzsýmen qamtamasyz etý boiynsha kóshbasshylardyń biri - Mańǵystaý oblysy. Biraq tushy sý kózderiniń tapshylyǵyna bailanysty (ásirese, jazda) halyqqa sý keste boiynsha beriledi. Qazirgi kezde óńir negizinen «Astrahan-Mańǵyshlaq» sý qubyry jáne tushylandyrylǵan teńiz sýy arqyly qamtamasyz etiledi. Olardyń jiyntyq qýaty táýligine 150 myń tekshe metrdi quraidy. Jazǵy kezeńde táýligine 51 myń tekshe metr aýyz sý tapshylyǵy bolady. Óńirdiń damý deńgeiin eskersek, tapshylyq 2025 jylǵa qarai táýligine 110 myń tekshe metrdi quraýy múmkin», - dedi Óskenbaev.
Onyń aitýynsha, atalǵan problemany sheshý maqsatynda Mańǵystaý oblysynyń ákimdigi 8 sý tushytý zaýytyn salýdy josparlap otyr.
«Bul maqsatqa oblysty áleýmettik-ekonomikalyq damytýdyń 2021-2025 jyldarǵa arnalǵan keshendi jospary aiasynda qarjylandyrýdyń barlyq kózderinen 232 mlrd teńge qarastyrylǵan», - dedi ministr.
Budan buryn habarlanǵandai, 2040 jylǵa qarai Qazaqstanda sý tutyný deńgeii 46 paiyzǵa artýy múmkin.
Aýyldardy aýyz sýmen qamtýdyń eń tómengi deńgeii Qostanai (74,9%) jáne Soltústik Qazaqstan oblystarynda (83,5%) tirkelgen.
