Balyqshylar Mańǵystaý oblysynyń Baýtino jáne Atash kentterinde jaǵalaýdan 160 óli sýquzǵyn tapqan. Bul týraly Mańǵystaý oblystyq orman sharýashylyǵy jáne janýarlar álemi aýmaqtyq inspektsiiasynyń bólim basshysy Turǵanbai Shapaǵatov málim etti, dep habarlaidy QazAqparat lada.kz saityna silteme jasap.
Onyń aitýynsha, mamandar sýquzǵyndardan adam áreketteriniń belgilerin tappaǵan. «Qustar Qyzyl kitapqa enbegen. Adamdardyń buǵan qatysy joq, olardyń qyrylýy ekologiiamen bailanysty bolýy múmkin. Ekologiia mamandary sý, aýa synamasyn jáne qustardyń etinen materialdar aldy. Nátijesi kelse mindetti túrde habarlaimyz. Biz olardyń jappai qyrylýyn 2-3 kún buryn bolǵan qatty daýylmen bailanystyryp otyrmyz», - dedi Turǵanbai Shapaǵatov.
Eske salaiyq, buǵan deiin óńir turǵyndary Fort-Shevchenko aýdanynda sý aidynynan qyrylyp qalǵan qustardy videoǵa túsirip alǵan bolatyn. Oqiǵa ornyna birneshe vedomstvo mamandary bardy. Onyń nátijesi týraly alynǵan synamalarǵa zertteý júrgizilgennen keiin habarlanady.
