Mańǵystaý oblysy Jańaózen qalasynda atys qarýyn jasaýǵa jáne satýǵa qatysy bar qylmystyq top ustaldy, dep habarlaidy Sputnik.
8 jeltoqsanda Jańaózen qalasynda atys qarýyn jasaýǵa jáne satýǵa qatysy bar qylmystyq topty ustaý boiynsha arnaiy operatsiia ótti.
Qala turǵyny "Kalashnikov" jaýyngerlik avtomatyn satyp jatqan jerinen ustaldy. Buǵan deiin ol "Makarov" tapanshasyn satqan, dep habarlady Ulttyq qaýipsizdik komiteti.
Qylmysqa qatysy bar adamdardyń turǵylyqty jerin tintý kezinde "Makarov" tapanshasy, 2 sholaq myltyq, oq-dári, sondai-aq asa iri mólsherde ártúrli esirtki ("mefedron", "apiyn") tárkilendi.
Kúdiktiler kinásin moiyndady. Olardyń úsheýine qatysty qamaýǵa alý túrinde bultartpaý sharasy tańdaldy.
Qylmystyq kodekstiń 287-baby ("qarýdy zańsyz ótkizý jáne saqtaý") jáne 297-baby ("esirtki zattaryn zańsyz saqtaý") boiynsha sotqa deiingi tergeý júrip jatyr. Ustalǵandardyń basqa qylmystarǵa qatysy bar-joǵy anyqtalýda.
