Mańǵystaý oblysynyń ákimi Serikbai Trumov bokstan álem chempiony Bekzat Nurdáýletovke Aqtaýdan 2 bólmeli páterdiń kiltin tabys etti, dep habarlaidy "Ult aqparat".
Oblys ákimdiginde chempiondy qabyldaǵan óńir basshysy el úmitin aqtaǵan Bekzatqa QR Prezidenti Qasym-Jomart Toqaevtyń arnaiy quttyqtaýyn jetkizip, páter kiltin tabystady.
«Ári qarai shyńdala ber. Jeńisti sátter kóp bolsyn! Sondyqtan Aqtaýdyń tórinen páter syilaimyz. Osyndai jetistikke jetkizgen bapkerleriniń eńbegi zor», - dedi Serikbai Trumov.
Bapkerlerin erekshe ataǵan aimaq basshysy olarǵa da qarjylai marapat syilady.
Bekzattyń jas kezindegi bapkeri Batyrbek Jailybaevqa 3 mln teńge, Marat Jákievke 5 mln teńge berildi.
Eske sala ketsek, Reseidiń Ekaterinbýrg qalasynda ótken bokstan Álem chempionatynda 81 keli salmaqta Bekzat Nurdáýletov álem chempiony atandy. Qazaqstandyq finalda ózbekstandyq boksshy Dilshodbek Rýzmetovpen judyryqtasyp, tóreshiler sheshimimen 5:0 esebin jeńiske jetti.
Buǵan deiin habarlaǵanymyzdai, búgin túnde Aqtaý áýejaiyna oblys ákimi Serikbai Trumov bastaǵan 100-den astam mańǵystaýlyq jinalyp, bokstan álem chempiony Bekzat Nurdáýletovti kútip aldy.
Sondai-aq, Bekzat Nurdáýletovti jeńisimen QR Prezidenti Qasym-Jomart Toqaev quttyqtaǵan bolatyn.
