Mánerlep syrǵanaýdan Saitamada (Japoniia) ótip jatqan álem chempionatynda qazaqstandyq Elizabet Tursynbaeva kúmis medal ielenip, tarihi jetistikke qol jetkizdi, dep habarlaidy "Ult aqparat" Azattyq agenttigine silteme jasap.
22 naýryzda ótken negizgi baǵdarlamada Tursynbaeva tórt ainalym salhov elementin sekirdi. Osylaisha, ol tórt ainalym element sekirgen alǵashqy áiel mánerlep syrǵanaýshy retinde tarihqa endi. Buǵan deiin mánerlep syrǵanaý tarihynda áielder arasynda eshkim tórt ainalym element sekirmegen.
Tursynbaeva negizgi baǵdarlamada Astor Piatstsollanyń «Otoño Porteño» (Býenes Airestegi tórt mezgil) áýenine bilep, 148,80 upai jinady. Al 19 naýryzda ótken qysqa baǵdarlamada Bethovenniń «Moonlight sonata» mýzykalyq kompozitsiiasyna bilep, 75,96 upai alǵan. Qos baǵdarlama nátijesi – 224,76 upai.
Elizabet aqpannyń ortasynda AQSh-ta ótken Tórt qurlyq chempionatynda 207 upaimen kúmis medal alǵan edi.
Otandasymyzdy 2018 jylǵa deiin kanadalyq maman Braian Orser jattyqtyrǵan. Al 2018 jyldyń jazynda ol reseilik jattyqtyrýshy Eteri Týtberidzeniń komandasyna aýysqan. Qazir Máskeýde jattyǵady.
Tursynbaeva 2016 jyly Lillehammerde (Norvegiia) ótken jasóspirimder arasyndaǵy qysqy olimpiadada qola alǵan. 2018 jyly Sapporoda (Japoniia) ótken Aziia oiyndarynyń qola júldegeri.
Aita keteiik, chempionattyń negizgi favoritteri bolǵan reseilik Alina Zagitova 237,50 upaimen álem chempiony atansa, onyń otandasy Evgeniia Medvedeva 223,80 balmen úshinshi orynǵa kóterildi.
Tursynbaeva – álem chempionatynda medal alǵan ekinshi qazaqstandyq mánerlep syrǵanaýshy. Qazaqstandyq Denis Ten 2013 jylǵy álem birinshiliginde kúmis, 2014 jylǵy álem chempionatynda qola alǵan.
Ten 2018 jyly 19 shildede Almatyda aýrýhanada qaitys bolǵan. Kóshede turǵan avtokóliginiń ainasyn urlaǵandardy toqtatpaq bolǵan sportshyny eki adam pyshaqtap ketken. Sot sportshynyń ólimine bailanysty aiyptalǵan Arman Qudaibergenov pen Nuraly Qiiasovty - 18 jylǵa, Janar Tolybaevany 4 jylǵa bas bostandyǵynan aiyrǵan.
