Nur-Sultan qalasynyń áýejaiynan mamonttardyń azý tisi men múiiztumsyqtardyń múiizin kontrabandalyq jolmen Qytaiǵa asyrmaq bolǵan Resei azamaty ustaldy, dep habarlaidy Qarjy monitoringi agenttigi.
«Qarjy monitoringi agenttiginiń elordalyq departamenti Resei Federatsiiasynyń azamatyna qatysty artefaktilerdiń ekonomikalyq kontrabandasy faktisi boiynsha tergeýdi bastady.
Resei azamaty Nur-Sultan qalasynyń Halyqaralyq áýejaiy arqyly jalpy salmaǵy 2 myń keliden asatyn mamonttardyń azý tisi men júndi múiiztumsyqtardyń múiizin Qytai Halyq Respýblikasyna kontrabandalyq jolmen áketýge tyrysqany anyqtaldy», - delingen aqparatta.
Málim etilgendei, taýardy jóneltýshi – Máskeý qalasyndaǵy Jaýapkershiligi shekteýli qoǵamdastyq direktory. Paleontologiialyq materialdardy Qazaqstan aýmaǵyna ákelý jáne odan ári QHR-ǵa jiberý maqsatynda Nur-Sultan qalasynda JShS tirkelip, direktory bolyp Resei azamaty taǵaiyndalǵan.
«Mamandardyń qorytyndysyna sáikes, mamonttar men júndi múiiztumsyqtardyń qazba qaldyqtarynyń zerttelgen barlyq bólikteri paleontologiialyq aretfaktilerdiń ǵylymi-tarihi, mádeni qundylyǵy bar ári biregei. Zerttelgen qazba qaldyqtarynyń barlyq bólikteriniń quny 173 million teńgeni quraidy.
Qoldanystaǵy zańnamaǵa sáikes mádeni qundylyqtardy Qazaqstan Respýblikasynan tys jerlerge áketýge tyiym salynady.
Osylaisha, ustalǵan azamat asa iri kólemde ekonomikalyq kontrabanda jasady degen kúdikke ilindi», - delingen vedomstvo habarlamasynda.
2021 jylǵy 1 qazanda kúdikti ustalyp, sot sanktsiiasymen qamaýǵa alynǵan.
«Ózge aqparat tergeý múddesinde jariia etýge jatpaidy», - dep túiindedi QR Qarjy monitoringi agenttiginiń baspasóz qyzmetinen.
