QR Premer-Ministri Asqar Mamin XII Kazenergy Eýraziialyq forýmynyń «Energiia kózderiniń bolashaǵy: innovatsiialyq damý» plenarlyq otyrysyna qatysty, dep habarlaidy "Ult aqparat" Úkimet basshysynyń baspasóz qyzmetine silteme jasap.
Úkimet basshysy «Digital energy» kórmesin qarap, Islandiianyń eks-Prezidenti jáne «Arktikalyq sheńber» halyqaralyq forýmynyń tóraǵasy O. R. Grimssonmen kezdesý ótkizdi, onda Almaty oblysynda geotermaldy energetikany damytý perspektivasyn talqylady, sondai-aq, Munai eksporttaýshy elder uiymynyń (OPEK) Bas hatshysy M. S. Barkindomen kezdesýde Qazaqstannyń OPEK-pen ózara is-qimyl máselelerin talqylady.
Forýmnyń saltanatty ashylý rásiminde Asqar Mamin Qazaqstannyń dástúrli qýat kózderiniń tiimdiligi men ónimdiligin arttyratynyn, sonymen qatar, jańartylatyn energiia kózderi salasyndaǵy aimaqtyq kóshbasshy retinde óziniń pozitsiiasyn josparly túrde nyǵaitatynyn atap ótti.
«2017 jyly Astanada Ekspo kórmesin ótkizgen ýaqyttan beri Qazaqstan ekonomikaǵa keshendi «jasyl» sharalardy engizýde eleýli jetistikterge qol jetkizdi. Búginde biz 3000-nan astam megavattqa deiin jańartylatyn energiia kózderi qorjynyn keńeittik. 2019 jyldyń alǵashqy 6 aiynyń ózinde sektordaǵy óndiris 31,7%-ǵa ulǵaityldy», — dedi Premer-Ministr.
Úkimet basshysy Qazaqstan jylyna 90 mln-ǵa jýyq tonna munai óndiretinin, bul elimizdi 15 iri álemdik óndirýshilerdiń qataryna qosatynyn atap ótti.
«Biz 2014 jyly 14,9 mln munai óńdesek, 2019 jyly 17,2 mln tonna munai óńdeýdi josparlap otyrmyz. Bul bizge birqatar munai ónimderine degen ishki qajettilikterimizdi tolyǵymen jabýǵa múmkindik beredi. Osy jyly tabiǵi gaz óndirý 55 mlrd tekshe metrden asady dep kútilýde. Qazirgi qarqyn saqtalǵan jaǵdaida biz 2027 jylǵa qarai 80 mlrd tekshe metrden astam óndiremiz», — dedi A. Mamin.
Premer-Ministr iske asyrý jáne ázirleý satylaryndaǵy qolda bar jobalar qorjyny Qazaqstandy álemdegi polietilen men polipropilenniń iri eksporttaýshysyna ainaldyrýǵa arnalǵanyn atap ótti.
«Gaz óndiretin jabdyqqa suranystyń artýy gaz-himiia mashinasyn jasaýda eleýli jetistikterge ákeldi. 2016 jyldan bastap 2018 jylǵa deiin saladaǵy óndiris kólemi shamamen 40%-ǵa - 39,4 mlrd-tan 54,8 mlrd teńgege deiin ósti, bul búkil ekonomika úshin ártaraptandyrýdyń ósip kele jatqan áleýetin kórsetedi», — dep atap ótti Úkimet basshysy.
Aita keteiik, Kazenergy Eýraziialyq forýmy óziniń on jyldan astam tarihynda aimaqtaǵy energetikalyq sektordyń basty halyqaralyq sharasyna ainaldy. Forým energetikalyq naryqqa qatysýshylar arasynda tiimdi dialogty qamtamasyz etýge, energetikalyq júieni damytýdyń ózekti úrdisteri men baǵyttaryn qarastyrýǵa baǵyttalǵan. Atalǵan shara aiasynda alǵa qoiylǵan perspektivalar men strategiialyq bastamalar elimizdiń munai-gaz jáne energetikalyq kesheniniń serpindi jáne turaqty damýyna qolaily jaǵdailar jasaidy.
Jyl saiyn Forýmǵa álemniń 50-den astam elinen 2500-den astam qatysýshy, onyń ishinde 30-dan astam halyqaralyq uiymdar, sondai-aq 300-ge jýyq iri energetikalyq kompaniialar keledi.
