Búgin QR Ulttyq olimpiada komiteti Bas assambleiasynyń otyrysynda el Premer-Ministri Asqar Mamin atalǵan uiymnyń aldyndaǵy basym mindetterdi aitty, dep habarlaidy QazAqparat.
«Olimpiadalyq sport túrlerin uiymdastyrýdyń qoldanystaǵy júiesi komandalarymyzdyń jattyǵý protsesin tiimdi qamtamasyz etýge múmkindik beredi. Sizderdiń nazarlaryńyzdy ásirese ósip kele jatqan býynǵa aýdartqym keledi. Olardyń arasynda kóptegen talanttar bar. Bizdiń ortaq maqsatymyz - olardy taýyp oqytý jáne iri álemdik jarystarda jeńiske jetkizý. Bul tarmaq árbir federatsiia úshin basymdyq bolyp sanalady», - dedi Asqar Mamin.
Úkimet basshysy ulttyq qurama komandamyz 2020 jyly Tokioda ótetin Olimpiada oiyndarynda laiyqty óner kórsetý úshin qazirden bastap bar kúsh-jigerdi jumsaý qajettigin aitty.
«Tájiribeli bapkerlerimiz, daryndy sportshylarymyz, jalpy áleýetimiz bar», - dedi ol.
Sondai-aq, Premer Ulttyq olimpiada komiteti elimizde sporttyń qarqyndy damýyna úlken úles qosyp otyrǵanyn aitty.
«Ózderińiz jaqsy bilesizder, Elbasy Nursultan Nazarbaevtyń strategiialyq baǵytynyń arqasynda Táýelsizdik jyldary qazaqstandyq sportshylardy daiyndaýdyń tiimdi júiesi quryldy. Alǵash ret 1994 jyly norvegiialyq Lillehammer qalasynda ótken Olimpida oiyndaryna qatysa bastaǵan kezeńnen beri ulttyq qurama 71 medal jeńip aldy. Memleket basshysy Qasym-Jomart Toqaev Qazaqstan halqyna arnalǵan Joldaýynda buqaralyq sportty damytý mindetin qoidy. Búgingi kúni elimizde dene shynyqtyrý jáne sportpen 5 millionǵa jýyq adam ainalysady.
Bul - halyqtyń arasynda sporttyń jappai taralýyna úlken mán berilip otyrǵanynyń aiqyn dáleli. Qazir barlyq jaǵdai jasalǵan. Jańa sport nysandary ashylýda. 38 myńnan astam ártúrli deńgeidegi sport keshenderi bar. Al balalarǵa 471 sport mektebinde sportpen ainalysýǵa múmkindik jasalǵan.
Osy iske asyrylyp jatqan sharalardyń barlyǵy salaýatty ultty qalyptastyrý men damytýdyń negizi bolyp sanalady. Qazirgi tańda balalar jáne jastar sporty, buqaralyq sport, kásibi sport jan-jaqty damýda. Osy rette sporttyń elimizde qarqyndy damýyna Ulttyq olimpiada komiteti úlken úles qosýda», - dedi otyrys barysynda Úkimet basshysy.
