Memleket basshysy Qasym-Jomart Toqaev Premer-Ministr Asqar Mamindi qabyldady, dep habarlaidy "Ult aqparat" Aqordaǵa silteme jasap.
Qasym-Jomart Toqaevqa Qazaqstannyń biylǵy qańtar-mamyr ailaryndaǵy áleýmettik-ekonomikalyq damýynyń qorytyndylary, elimizdegi sanitarlyq-epidemiologiialyq ahýal men egis naýqanynyń aiaqtalǵany jóninde esep berildi.
Premer-Ministr Qazaqstan ekonomikasynyń pandemiiadan keiingi qaita qalpyna kelý satysyna ótkeni týraly aitty. Biylǵy qańtar-mamyr ailaryndaǵy ishki jalpy ónim ósiminiń qarqyny byltyrǵy osy kezeńmen salystyrǵanda 1,6 paiyzdy qurady.
Asqar Maminniń aitýynsha, damýdyń negizgi qozǵaýshy kúshi 7,2 paiyzdyq ósim deńgeiin kórsetip otyrǵan óńdeý ónerkásibi (mashina jasaý, qurylys materialdaryn óndirý, jeńil ónerkásip jáne t.b. salalarda qarqyndy ósim bar), qurylys sektory bolyp otyr.
Ekonomikanyń óndirmeitin sektorlarynda joǵary investitsiialyq belsendilik baiqalady. Negizgi kapitalǵa quiylǵan investitsiianyń ósimi taý-ken salasyn esepke almaǵanda 25,5 paiyzǵa jetken.
Prezidentke kóktemgi egin egý jumystarynyń nátijesinde egis alqaptary 78,2 myń gektarǵa ulǵaiyp, 22,7 million gektarǵa deiin artqany jóninde baiandaldy.
Úkimet kóktemgi egis naýqanyn qarjylyq, materialdyq-tehnikalyq turǵydan qamtamasyz etý úshin barlyq qajetti sheshimderdi qabyldady. Kóktemgi egis jumystaryna 128 milliard teńge qarjy bólinip, 380 myń tonna janarmai naryqtaǵy baǵadan 14 paiyzǵa tómen satylǵan jáne 405,3 myń tonna tyńaitqysh berilgen.
Premer-Ministr elimizdegi sanitarlyq-epidemiologiialyq ahýaldyń jaqsarǵanyn aityp, Covid-19 indetiniń taralýy boiynsha Qazaqstan «sary» aimaqtan «jasyl» aimaqqa ótkenin jetkizdi. Bir apta ishinde indet juqtyrý deńgeii 30 paiyzǵa azaiyp, koronavirýstyń taralý indeksi 0,84-ke deiin tómendegen. Juqpaly aýrýlar bólimderiniń 24 paiyzynda, jan saqtaý bólimderiniń 21 paiyzynda naýqastar em qabyldap jatyr.
Nur-Sultan qalasy «qyzyl» aimaqta, Almaty qalasy, Atyraý, Pavlodar, Batys Qazaqstan, Aqmola jáne Qaraǵandy oblystary «sary» aimaqta. Qalǵan 10 oblys – «jasyl» aimaqta.
Qazirgi tańda 2,4 million adam ekpeniń birinshi komponentin aldy, 1,3 millionǵa jýyq adamǵa ekpeniń ekinshi komponenti salynǵan.
Memleket basshysy turǵyndarǵa vaktsina salý qarqynyn báseńdetpeýdiń jáne epidemiiaǵa qarsy sharalardy jalǵastyrýdyń mańyzdy ekenin atap ótti.
Kezdesý qorytyndysy boiynsha Prezident áleýmettik mańyzy bar azyq-túlik taýarlarynyń baǵasyn ustap turý, qurylys materialdarynyń baǵasyn retteý, syrtqy jáne ishki investitsiia kólemin arttyrý, óńdeý sektoryn damytyp, ósimin qamtamasyz etý arqyly ekonomikanyń qurylymdaryn ártaraptandyrý jónindegi sharalardy júzege asyrýǵa basa mán berýdi tapsyrdy.
