QR Premer-Ministri, QR hokkei federatsiiasynyń prezidenti Asqar Mamin shaibaly hokkeiden QR Prezidenti kýbogynyń jeńimpazdary men júldegerlerin marapattady, dep habarlaidy "Ult aqparat" «Habar 24» telearnasyna silteme jasap.
Buǵan deiin habarlaǵanymyzdai, elordada shaibaly hokkeiden QR Prezidenti kýbogynyń 10-ynshy mereitoilyq týrniri aiaqtaldy. Biyl oǵan QHL Shyǵys konferentsiiasynan: Qazannan «Ak bars», Ýfadan «Salavat Iýlaev», Ekaterinbýrgten «Avtomobilist», Nijnekamskiden «Neftehimik» jáne Nur-Sultan qalasynan «Barys» klýbtary qatysty.
Bas júldeni Qazaqstan astanasynyń komandasy jeńip aldy. «Barys» týrnir aiasynda tórt match ótkizip, onyń barlyǵynda qarsylasynan basym tústi. Andrei Skabelkanyń qaramaǵyndaǵy oiynshylar «Ak Barsty» - 6:1, «Neftehimikti» - 5:3, «Avtomobilisti» - 3:2, «Salavat Iýlaevty» 2:1 esebimen jeńdi.
Aita keteiik, QR Prezidentiniń kýbogy oinatylyp jatqan 10 jylda elordalyq klýb bas júldeni besinshi ret ielenip otyr. Týrnir qorytyndysy boiynsha ekinshi oryn «Avtomobilistke», úshinshi oryn «Ak Barsqa» buiyrdy.
Sondai-aq jeke nominatsiialar boiynsha úzdik oiynshylar da marapattaldy. Atap aitsaq, Edýard Paskýale («Barys») – úzdik qaqpashy, Darren Dits («Barys») – úzdik qorǵaýshy, Rodion Amirov («Salavat Iýlaev») – úzdik shabýylshy, Dastin Boid («Barys») úzdik bombardir tanyldy.
Jeńimpazdar men júldegerlerge marapattardy QR Premer-Ministri, QR hokkei federatsiiasynyń prezidenti Asqar Mamin tapsyrdy.
Qazaqstandyq klýbty týrnirdegi jeńisimen Memleket basshysy Qasym-Jomart Toqaev quttyqtady.
