QR Premer-Ministri Asqar Mamin investitsiialyq yntymaqtastyqty odan ári damytý máseleleri jónindegi dialog alańy aiasynda Eýropalyq odaqqa múshe memleketterdiń diplomatiialyq missiialarynyń basshylarymen kezekti kezdesýdi ótkizdi, dep habarlaidy "Ult aqparat" Úkimet basshysynyń baspasóz qyzmetine silteme jasap.
QR Premer-Ministri Asqar Mamin Tuńǵysh Prezident – Elbasy Nursultan Nazarbaev pen Memleket basshysy Qasym-Jomart Toqaev Eýropalyq odaq elderimen ornaǵan yntymaqtastyqqa asa kóńil bóletinin atap ótti.
«EO – Qazaqstannyń basty investorlarynyń biri jáne iri saýda seriktesi. 2019 jyldyń 9 aiynda QR ekonomikasyna túsken tikelei sheteldik investitsiialar aǵyny $8,7 mlrd deiin 15,8%-ǵa artty», — dedi A. Mamin.
Úkimet basshysy biyl 1 naýryzda QR–EO arasyndaǵy Keńeitilgen seriktestik pen yntymaqtastyq týraly kelisimniń (KSYK) kúshine enýi Qazaqstan–Eýropa qatynastaryndaǵy sapaly jańa kezeńniń bastalýyn bildiretinin atap ótti. Qujat saýda, investitsiialar, innovatsiialar jáne infraqurylymdyq damýdy qosa alǵanda, qyzmettiń 29 salasyn qamtidy.
A. Mamin Eýropalyq odaqtyń elshilerin Qazaqstannyń EO-men saýda-ekonomikalyq jáne investitsiialyq yntymaqtastyǵyna járdemdesý boiynsha ashyq ári belsendi dialogty odan ári jalǵastyrýǵa shaqyrdy.
Óz kezeginde, diplomatiialyq missiialardyń basshylary Qazaqstanda biznesti júrgizý úshin qolaily jaǵdai jasaý jumystarynyń oń qarqynyn atap ótti.
«Qazaqstan «Doing Business» reitinginde turaqty progreske qol jetkizýde jáne investitsiialyq ahýal men iskerlik ortany odan ári jaqsartý úshin zor áleýetke ie. Munda Qazaqstannyń EO-men investitsiialyq yntymaqtastyǵy jónindegi dialog úlken ról atqarady», — dedi QR-daǵy EO ókildiginiń basshysy Sven-Olov Karlsson.
Taraptar QR Prezidenti Q. Toqaevtyń Briýssel qalasyna aldaǵy saparyna daiyndyqty, KSYK iske asyrý boiynsha qazaqstandyq tarap ázirlegen jol kartasyn, sondai-aq QR-da investorlardy sybailas jemqorlyqqa qarsy súiemeldeý jáne salyq saiasaty máselelerin talqylady.
Kezdesýge Avstriia, Belgiia, Germaniia, Frantsiia, Niderlandy, Polsha, Ispaniia, Estoniia, Italiia, Latviia, Litva, Grekiia, Ispaniia, Horvatiia, Rýmyniia, Slovakiia, Majarstan, Finliandiia, Shvetsiia elshileri, Portýgaliia, Bolgariia, Chehiia, sondai-aq iri eýropalyq kompaniialardyń ókilderi qatysty.
Biyl sáýir aiynda ótetin Qazaqstannyń EO-men investitsiialyq yntymaqtastyǵy jónindegi dialogtyń kelesi otyrysynda KSYK júzege asyrý boiynsha naqty qadamdardy, QR-nyń jasyl ekonomikaǵa kóshý máselelerin jáne osy jyldyń maýsym aiynda Nur-Sultan qalasynda ótetin DSU XII Ministrler konferentsiiasyna daiyndyq máselelerin talqylaý josparlanǵan.
