QR Premer-Ministri Asqar Maminniń tóraǵalyǵymen ótken Úkimet otyrysynda aýylda internetke keń jolaqty qoljetimdilikti qamtamasyz etý jáne 5G-di damytý máseleleri qaraldy, dep habarlaidy "Ult aqparat" primeminister.kz saityna silteme jasap.
QR tsifrlyq damý, innovatsiialar jáne aeroǵarysh ónerkásibi ministri A. Jumaǵaliev jáne «Qazaqtelekom» AQ basqarma tóraǵasy Q. Esekeev atqarylyp jatqan jumystar barysy týraly baiandady.
Elbasynyń «Nur Otan» partiiasynyń XVIII sezinde bergen jáne Memleket basshysynyń biylǵy 2 qyrkúiekte Qazaqstan halqyna arnaǵan Joldaýynda bergen tapsyrmalaryna sáikes, «Aýyl – El besigi» jobasy aiasynda aýyldyq aýmaqtardyń áleýmettik jáne injenerlik infraqurylymyn jańǵyrtý jumystary júrgizilip jatyr.
2022 jyldyń sońyna deiin aýyldyq eldi mekenderdiń 97% quraityn 5 myńnan astam aýylda internet qoljetimdi bolýy tiis. Bul aýyl turǵyndaryna elektrondy memlekettik qyzmetter men servisterdi, meditsinalyq qyzmetter men bilim alýdyń, elektrondyq saýdanyń artyqshylyqtaryn paidalanýǵa, sonymen qatar jańa ómir standarttaryna jappai kóshýge jol ashady.
Tsifrlyq damý, innovatsiialar jáne aeroǵarysh ónerkásibi ministrligi aýyldyq eldi mekenderde (AEM) talshyqty-optikalyq bailanys jelilerin salý (2020 jylǵa deiin qosa alǵanda 1250 AEM), LTE qosý jáne symsyz radioqoljetimdilik jelilerin tóseýdi (6019 AEM) qamtamasyz etý boiynsha jumystardy júrgizýde. Sonymen qatar, 5G bailanysynyń jańa býyny keń jolaqty symsyz qosylýdy qamtamasyz etý, zattar interneti jáne joǵary jyldamdyqty tehnologiialardy uiymdastyrý úshin qatar damýda. Qazirgi ýaqytta 5G testilik synaqtary Nur-Sultan jáne Almaty qalalarynda júrgizilip jatyr, olardy osy jyldyń qazan aiynda Shymkent qalasynda ótkizý josparlanǵan.
Úkimet basshysy Tsifrlyq damý, innovatsiialar jáne aeroǵarysh ónerkásibi ministrligine bailanys operatorlarymen birlese otyryp, óńirlerde talshyqty-optikalyq bailanys jelilerin salý jumystaryn jedeldetýdi jáne aýyldyq eldi mekenderdi joǵary jyldamdyqty internetke qosýdy jyldamdatýdy tapsyrdy.
«Elbasy men Memleket basshysynyń aýyldyq jerlerde joǵary jyldamdyqty internetti qosý jónindegi tapsyrmalarynyń sózsiz oryndalýyn qamtamasyz etý qajet. Bul jumys belgilengen merzimde – 2022 jylǵa qarai aiaqtalýy tiis», — dedi A. Mamin.
Premer-Ministr 5G-di paidalanýdyń basymdyǵyn durys anyqtap alý qajet ekenin atap ótti, ol úshin 2020 jyly 5G-di óńirlerde, sonyń ishinde, aldymen Nur-Sultan qalasynda tiimdi paidalaný jóninde tiisti jobalar ázirlenýi kerek.
Sonymen qatar, A. Mamin Tsifrlyq damý, innovatsiialar jáne aeroǵarysh ónerkásibi ministrliginiń nazaryn bailanys jáne internet sapasyna, ásirese áleýmettik nysandardaǵy sapasynyń jaqsy bolýyna aýdardy.
«Mektepter men aýrýhanalarda joǵary jyldamdyqty sapaly internet bolýy kerek – bul elektrondy oqýlyqtar men oqý baǵdarlamalaryn, telemeditsina men aqparattyq júielerdi paidalaný úshin qajet», — dep atap ótti Premer-Ministr.
