QR Premer-Ministri A. Mamin 2020 jyly iri avtojol jobalaryn iske asyrýdy aiaqtaýdy tapsyrdy, dep jazady primeminister.kz.
QR Premer-Ministri Asqar Maminniń tóraǵalyǵymen 2020-2025 jyldarǵa arnalǵan «Nurly jol» memlekettik baǵdarlamasy aiasynda avtojol salasyn damytý jóninde keńes ótti.
Avtojol salasyndaǵy qurylys maýsymyna daiyndyq týraly indýstriia jáne infraqurylymdyq damý ministri B. Atamqulov, bitýmmen qamtamasyz etý jaǵdaiy jóninde energetika ministri N. Noǵaev, eńbekti qorǵaý jáne qaýipsizdik tehnikasyn qamtamasyz etý sharalary boiynsha, sondai-aq sheteldik jumys kúshin tartýǵa kvota berý týraly eńbek jáne halyqty áleýmettik qorǵaý ministri B. Nurymbetov, tabiǵatty qorǵaý sharalarynyń saqtalýy týraly ekologiia, geologiia jáne tabiǵi resýrstar ministri M. Myrzaǵaliev, jergilikti jumysshy kadrlardy daiarlaý týraly Almaty oblysynyń ákimi A. Batalov, Shyǵys Qazaqstan oblysynyń ákimi D. Ahmetov, Qaraǵandy oblysynyń ákimi J. Qasymbek, Jambyl oblysynyń ákimi A. Myrzahmetov, avtojol jobalarynyń iske asyrylý barysy týraly merdigerlik uiymdar men «QazAvtoJol» UK» AQ ókilderi baiandady.
2019 jyly respýblikalyq mańyzy bar 4,4 myń shaqyrym avtojol salyndy jáne rekonstrýktsiialandy. Jyl qorytyndysy boiynsha 641 shaqyrym jolda qozǵalys ashyldy. 1,1 myń shaqyrym respýblikalyq mańyzy bar jáne 3,5 myń shaqyrym jergilikti jelilerdegi avtojolǵa kúrdeli jáne ortasha jóndeý jumystary júrgizildi. Jaqsy jáne qanaǵattanarlyq jaǵdaidaǵy respýblikalyq mańyzy bar avtojoldardyń úlesi 88%-ǵa, jergilikti mańyzy bar joldar 71%-ǵa jetkizildi. Respýblikalyq mańyzy bar I jáne II tehnikalyq sanattaǵy joldardyń uzyndyǵy 34%-ǵa (8,2 myń shaqyrymǵa) deiin arttyryldy.
Avtojol salasynyń 2020 jylǵa arnalǵan biýdjeti 750 mlrd teńgeni quraidy, respýblikalyq jáne jergilikti mańyzy bar 9,8 myń shaqyrym avtojol jóndeý jumystarymen qamtylady. Qurylys jumystarymen 4 myń shaqyrym avtojol qamtylady.
Jyl qorytyndysy boiynsha jalpy uzyndyǵy 2,6 myń shaqyrym avtojol ýchaskelerinde qozǵalysty ashý josparlanýda, sonyń ishinde Taldyqorǵan – Óskemen (763 km), Qaraǵandy – Balqash – Qapshaǵai (645 km), Qalbataý – Maiqapshaǵai (415 km), Merki – Býrylbaital (266 km), Aqtóbe – Atyraý – Astrahan (279 km) jáne basqalar.
Respýblikalyq jáne jergilikti jeliniń jol-qurylys jumystaryna barlyǵy 100 myńǵa jýyq adam jumyldyrylatyn bolady, «A» sanatyndaǵy jol boiyndaǵy servistiń 18 kópfýnktsionaldy keshenin salý úshin investitsiialar tartý, 304 sanitarlyq-gigienalyq torapty salý jáne qyzmet kórsetý josparlanǵan.
«Biyl avtomobil joldaryn salý boiynsha aýqymdy jumys kólemin atqarý qajet. Alǵa qoiylǵan mindetterdi ýaqytyly ári sapaly oryndaý jáne jyl sońyna deiin avtomobil joldaryn jańǵyrtýdyń negizgi jobalary boiynsha qozǵalysty qamtamasyz etý maqsatynda qurylys maýsymyna aldyn-ala daiyndalý kerek», — dedi Úkimet basshysy.
