Belsendi J.Mamai men I.Imanbaevaǵa qatysty atqarýshylyq is júrgizý qozǵaldy jáne májbúrlep oryndatý boiynsha sharalar qabyldana bastady. Bul týraly Baýyrjan Baibektiń zańgeri Aijan Tashenova óziniń feisbýktegi paraqshasynda jazdy.
«26 tamyzda bizdiń usynysymyz boiynsha jeke sot oryndaýshysy jaýapkerlerdiń shottary men múlkine aýyrtpalyq saldy, olarǵa belgili bir (notarialdyq) is-áreketter jasaýǵa tyiym salyndy. Jaýapker qarajat jinaý úshin usynǵan «Kaspi»-degi Mamaidyń jeke shotyna da shekteý qoiyldy. J.Mamai men I.Imanbaevanyń shottarynan sot shyǵyndaryn óteý esebine 170 895 teńge tutastai májbúrlep alyndy. Jaýapkerlerdiń shottaryna kelip túsetin barlyq aqsha B.Baibektiń talap-aryzy boiynsha bereshekti óteýge ǵana jumsalatyn bolady», - dep jazdy ol.
Buǵan qosa zańger jaýapkerlerdiń aqshamen basqa eshqandai áreket jasai almaityn jetkizdi.
«B.Baibektiń ótinishi boiynsha sot oryndaýshysy J.Mamai men I.Imanbaevadan alynǵan barlyq aqshany aýtizmi bar balalardy qoldaý úshin birden «Bolashaq» korporativtik qorynyń shotyna tikelei aýdarady. Qaitalap aitamyn, bul erikti túrde emes, májbúrleý arqyly, zańda belgilengen rásimder aiasynda jasalynyp jatyr. Osylaisha B.Baibektiń J.Mamai men I.Imanbaevaǵa qatysty talap aryzy boiynsha sot shyǵyndaryn óteý bóligindegi sot sheshiminiń oryndalýy qarqyndy túrde júrýde», - delingen Tashenovanyń jazbasynda.
Sondai-aq Baibektiń zańgeri sot sheshimi jaýapkerlerdiń qandai da bir qýlyqtary men málimdemelerine qaramastan, tolyq kólemde oryndalatyn bolatynyn eskertti. Bul úshin zańda jan-jaqty sharalar kózdelgen.
