Asyl tuqymdy qoi ósiretin Almasbek Sadyrbaev mal sharýashylyǵymen ainalysatyn qojalyq ielerine jer berilý kerek dep sanaidy. Sebebi, qazir aýyl halqynda jer bolmaǵandyqtan, jastar qalaǵa kóship, bazar jaǵalap júr, - dep habarlaidy QazAqparat.
«Qanshama jas qazir qalaǵa baryp, bazarda arba súiretip júr. Sebebi, aýylda jumys joq. Al qojalyq ielerine jer berse, malyn ósirip, tirshiligin jasaityn edi, kásibin damytatyn edi. Bizde urpaqtar sabaqtastyǵy degen joq. Mysaly, qojalyq iesine jer berilse, ol malyn, jerin, erteń urpaǵyna beredi. Solai biz sharýashylyǵymyzdy damytamyz. Myna ulan ǵaiyr jerimiz, bos jatpaityn edi, igeriletin edi», - dedi «Shopan ata» qoi ósirýshiler qaýymdastyǵynyń tóraǵasy Almasbek Sadyrbaev.
Almasbek Sadyrbaev jer komissiiasynyń múshesi. Búgingi otyrysqa qatysty. Ol 17 jyldan beri shopan ata tólin asyldandyrýmen ainalysyp kele jatqan azamat. Búginde qoidyń basyn 3 myńǵa jetkizgen. Asyl tuqymdy qoshqar men qoidan bir mezette 5-7 embrion alyp, asyl tuqymdy emes qoiǵa salý arqyly ýaqyt únemdeý múmkindigin, mal jaiýdyń tiimdi ádisin elimizde alǵashqylardyń biri bolyp igergen Almasbek Sadyrbaev. Biraq ol ózinde jer joq ekenin aitady.
«Men qoiymdy qazir bireýge baqtyryp otyrmyn. Sebebi mende jer joq. Ár qojalyq iesine 500 gektardan jer berse, sharýashylyq damityn edi. Mysaly mende bastapqyda jer boldy. Biraq óte kishkentai. Men balalarymnyń aýzynan jyryp salǵan qojalyǵymdy tastap, keń jer izdeýge kettim. Sebebi, maldy syidyrý kerek. Búginde qoidyń basy 3 myńǵa jaqyndap qaldy. Sondyqtan aýyl sharýashylyǵyn damytamyz desek, sharýalarǵa jer berip, qoldaý kerek», - dedi Almasbek Sadyrbaev.
