Túrkistan oblysynyń ákimi Ómirzaq Shókeev búgin Maqtaaral aýdanyndaǵy sý basqan aýyldarǵa arnaiy kelip, jergilikti turǵyndarmen kezdesti, dep habarlaidy "Ult aqparat".
Aimaq basshysy halyq qalaýlylary men qoǵamdyq keńes múshelerimen birge sý tasqynynan zardap shekken turǵyndardyń búgingi jaǵdaiymen tanysty.
Ómirzaq Shókeev Jańajol aýyldyq okrýgine qarasty Órgebas jáne Firdoýsi aýyldaryn qalpyna keltirý jumysynyń barysymen tanysyp, eldimekenderdi aralap kórdi. Kezdesý barysynda oblys ákimi jaýaptylarǵa apattan japa shekken turǵyndardyń ótemaqysyn tezdetip tóleýdi, aýyldardy qalypqa keltirý jumysyn jedeldetýdi tapsyrdy.
Aita keteiik, qalǵan aýyldarda qiraǵan úilerdi buzý men qurylys materialdaryn tasymaldaýǵa Ózbekstan eliniń tótenshe jaǵdai ministrligi tarapynan da kómek kúshi jumyldyrylǵan.
Máselen, Órgebas aýylyndaǵy 197 úidiń barlyǵy jańadan salynady dep josparlanyp otyr. Aýyl turǵyndarynyń 90 paiyzyna qurylys qarajatynyń jartysy berilgen. Nátijesinde 20-ǵa jýyq úidiń irgetasy qalanyp, qabyrǵasy kóterilgen.
Al, Firdaýsi aýylynda 320 turǵyn úi ieleriniń jartysynan astamy qarajatyn qolyna alǵan. Aýylda apattan zardap shekken baspanalar buzylyp, jańa úilerdiń qurylysy bastalyp ketken.
Jalpy, sý shaiǵan aýyldardyń barlyǵynda infraqurylym tolyǵymen jańartylýda.
