Maqtaaral aýdanynda sý tasqynynan zardap shekken birde bir turǵyn kómekten shet qalmaidy. Túrkistan oblysy ákiminiń orynbasary Sáken Qalqamanov kezekti brifing barysynda qazirgi ahýaldy baiandap ótti, dep habarlaidy QazAqparat.
Oblys ákimi orynbasarynyń aitýynsha, aǵyn sýdan kelgen shyǵyn túgel esepteledi. Sodan keiin ǵana Úkimet pen oblystyq rezervten qarjy bólinip, turǵyndarǵa tólenedi. Al, tótenshe jaǵdaidy paidalanyp, jalǵan aqparat taratýshylar men alaiaqtyq jasaǵandardyń isimen politsiia ainalysady.
«Qazirgi tańda kóptegen azamattar ózderine jalǵan tanymaldylyq jasap alǵysy keledi. Ondai azamattardyń maqsaty da belgili. Biz mundai málimetterdi politsiiaǵa joldap jatyrmyz. Máselen, bizge jańa ǵana maqtaaraldyqtarǵa kómek kórsetý úshin bir azamattyń kaspi goldpen esepshot ashqany týraly habar kelip tústi. Biz bul málimetti politsiia men prokýratýraǵa joldadyq. Tergeý júrgiziletin bolady. Tótenshe jaǵdai kezinde jalǵan aqparat taratqan kez-kelgen azamat ákimshilik jáne basqa da jazalarǵa tartylatyn bolady», - dedi Sáken Qalqamanov.
Nur Otan partiiasy oblystyq filialy tóraǵasynyń orynbasary Beisenbai Tájibaev zardap shegýshilerge kórsetilip jatqan kómek barysyn aityp ótti. Ol aýdanda ashylǵan 22 evakýatsiialyq pýnkte turǵyndardyń ystyq tamaqpen jáne qajetti jaǵdaimen qamtamasyz etilip otyrǵanyn jetkizdi. Jańadan ashylǵan kómek qory týraly túsindirip ketti.
«Búginde maqtaraldyqtarǵa kómek kórsetý úshin arnaiy qor ashylǵan. Ondaǵy qarajattardyń durys jumsalýy arnaiy Ardagerler keńesiniń músheleri, aýyldardyń belsendileri qosymsha baqylaityn bolady. Sondai-aq, zattai nemese kiim-keshekpen kómektesemin deýshiler úshin Asyqata kentinde arnaiy qoima ashylǵan. Onda Nur Otan partiiasynyń jergilikti belsendileri men aqsaqaldar qaýymy, janashyr azamattar qoǵamdyq negizde qyzmet atqaratyn bolady. Olar barlyq bólingen zattardy qoǵamdyq negizde qadaǵalaý júrgizedi. Barlyq jumys ashyq uiymdastyrylady»,- deidi Beisenbai Tájibaev.
