Ejelgi Saraishyq qalasynyń aýmaǵynda zamanaýi týrizm infraqurylymyn damytý jobasy jyl saiyn Atyraýǵa 700 myń týristiń kelýine jol ashady, dep habarlaidy QazAqparat.
Bul týraly Atyraý oblysynyń ákimi Mahambet Dosmuhambetov «Ulyq ulys — Altyn Orda» atty halyqaralyq konferentsiiada aitty.
«Atyraý oblysynyń áleýmettik-ekonomikalyq damý máseleleri jónindegi keńeste Memleket basshysy Qasym-Jomart Kemeluly Saraishyqtyń mańyzy men tanymaldyǵyn arttyrý úshin zamanaýi týrizm infraqurylymyn salýdy tapsyrǵan. San salanyń mamandaryn jumyldyrý arqyly «Saraishyq qalashyǵynyń» jobasy jasaldy. Jospar boiynsha keshen aýmaǵynda 20 shaqty nysan boi kóteredi. Sonyń ishinde «Jaiyqtan óter jyljymaly júzbeli kópirdi» erekshe atap ótýimiz kerek», — degen aimaq basshysy aspaly kópirmen Ibn Battýtanyń Jaiyqtan júzip ótkeni týraly tarihi derekter bar ekenin eske saldy.
Aitýynsha, Ibn Battýtanyń esteliginde Saraishyq aýmaǵynda «Orda bazardyń» da bolǵany ańyz bolyp aitylady.
Sondyqtan bul kieli mekendi saýda ortalyǵy retinde damytý asa mańyzdy.
«Búginde Saraishyq mýzei qoryǵynyń qorynda 4600 jádiger saqtaýly. Onyń 400-deii ǵana kóriniske shyǵarylǵan. Osy jaǵdai jańa «Altyn Orda» murajaiyn salýǵa negiz bolyp otyr. Saraishyq zamanynda qolónershiler oshaǵy bolǵan. Al qazirgi tańda óńirimizde 200-ge jýyq qolónershi bar. Bul dástúrdi de qaita jańǵyrtýymyz kerek», — dedi oblys ákimi.
Sondai-aq, ol álemge áigili bolǵan Saraishyq baǵyn eske salatyn saiabaq ashylatynyn atady.
«Keshen ishinde jylqy, túiemen seiil qurý jáne Jaiyq ózeninde altyn qaiyqpen serýendeý kópshiliktiń qyzyǵýshylyǵyn oiatatyn joba bolmaq. Sondai-aq, bul jerde halqymyzdyń etnomádenietine negizdegen ulttyq oiyndar jáne mádeni-buqaralyq sharalar ótkiziledi. Bul jobalarǵa shaǵyn jáne orta biznes ókilderin tartý josparda bar. Qazirgi tańda Saraishyq memorialdy keshenine kelýshilerdiń sany 20 myńǵa jýyq. Joba iske qosylǵan jaǵdaida týrister sany 700 myńǵa deiin artady degen boljam bar. Sondai-aq, júzdegen jumys orny ashylady», — dedi Mahambet Dosmuhambetov.
