AQSh-tyń Las-Vegas qalasyndaǵy «T-Mobail Arena»-da aralas jekpe-jektiń (MMA) tarihyndaǵy eń aitýly aiqastardyń biri, UFC 229 týrniriniń aqtyq saiysy - irlandiialyq Konor Makgregor men reseilik Habib Nýrmagomedovtyń jekpe-jegi aiaqtaldy, dep habarlaidy QazAqparat tilshisi.
«Ǵasyr aiqasy» atalyp ketken kezdesýde Nýrmogamedov alǵashqy raýndta birden ózine yńǵaily balýandyq ádiske saldy. Qarsylasyn tapjyltpai basqanymen, Konor saýatty qorǵana bildi. Aiqastyń osylaisha soqqy almasý tártibimen ótpegenine yrza bolmaǵan zaldyń ýili arenany sharlap ketti. Alǵashqy raýnd tórt minýttyq partermen ótti.
Ekinshi raýndta Habibtiń aýyr soqqysy dál tidi. Parterge qaita túsip qalǵan Konordyń joly bolmaǵany anyq. Úshinshi minýtta irlandiialyqty taǵy qulatyp alǵan reseilik aitarlyqtai soqqysyn darytyp úlgerdi. Ekinshi raýnd Habib tarapynan bir jaqty sabaý tártibimen aiaqtaldy.
Úshinshi raýndta Konor aldyńǵy eki raýndtaǵy olqylyqtyń ornyn toltyryp, birneshe soqqysyn ótkizdi. Alaida betpe-bet aiqasta Qap taýynyń qabylany shydas beretinin kórsetkisi kelgendei. Habibtiń birneshe klinch ádisteri jemissiz aiaqtaldy.
Tórtinshi raýnda Habib Nýrmogamedov qarsylasyn qylqyndyrý ádisimen jeńiske jetti.
Aita ketsek, osy jekpe-jektiń anderkartynda týrnirdiń eń mańyzdy kezdesýleriniń biri - jeńil salmaqtaǵy Toni Fergiýson men Entoni Pettistiń aiqasy ótken bolatyn. Eki raýnda sozylǵan aiqasta Entoni Pettistiń qoly synyp, 34 jastaǵy Fergiýson jeńis týyn jelbiretti.
Eske salaiyq, buǵan deiin Konor Makgregor Habib Nýrmagomedovpen ótetin jekpe-jekten 100 mln dollar tabýy múmkin ekenin habarlaǵan bolatynbyz.
