QR Ekologiia, geologiia jáne tabiǵi resýrstar ministri Maǵzum Myrzaǵaliev Dúniejúzilik qorshaǵan ortany qorǵaý kúni qarsańynda ekovolonterlermen, ekologiialyq fakýltetterdiń stýdentterimen kezdesti, dep habarlaidy QazAqparat.
«Erteń bizdiń kásibi merekemiz – Dúniejúzilik qorshaǵan orta kúni atalyp ótedi. Bul bizdiń merekemiz ǵana emes, qorshaǵan ortany qorǵaýǵa úlken úles qosyp júrgenderge ortaq kún. 5 maýsymnyń da kezdeisoq tańdalmaǵanyn atap ótkim keledi. 1972 jyly 5 maýsymda Stokgolm konferentsiiasy óz jumysyn bastaǵan edi. Ondaǵy negizgi máselelerdiń biri – qorshaǵan ortany qorǵaý salasyndaǵy halyqaralyq saiasatty ázirleý boldy. Osyǵan bailanysty BUU Bas Assambleiasy 5 maýsymdy qorshaǵan orta kúni dep belgileitin qarar qabyldady. Bul qararda ekologiialyq problemalar, qorshaǵan ortany tazartýǵa shaqyrý týraly kóp aitylady», - dedi Ekologiia ministri Halyqaralyq jasyl tehnologiialar jáne investitsiialyq jobalar ortalyǵynda ótken jastarmen kezdesýde.
Jyl saiyn Dúniejúzilik qorshaǵan ortany qorǵaý kúniniń arnaiy taqyryby men urany belgilenedi. Biylǵy taqyryp – «Qaita qarastyrý, qaita qurý jáne qalpyna keltirý» bolmaq. Ministrdiń aitýynsha, biz de qazir qaita qarastyrý kezeńinde turmyz.
«Sońǵy jyldary taza aýa, qorshaǵan ortany qorǵaý taqyrybyna bei-jai qaramaityn qarapaiym azamattardyń ekologiia taqyrybyn belsendi kóterip júrgenderi bizdi qatty qýantady. Pandemiia kezinde planeta biraz demaldy, bul bizge tabiǵattyń róli men adamnyń ornyn qaita qarastyrýymyz keregin kórsetedi», - dedi Maǵzum Myrzaǵaliev.
Kezdesý barysynda ministr eldegi basa mán berilýi qajet eki mańyzdy problemany atap ótti.
«Taza aýa jáne qaldyqtardyń az óńdelýi máseleleri ózekti bolyp otyr. Bizdiń ainalamyzda ushyp júrgen paketter, lastanǵan saiabaqtar óte kóp. Biz de qazir belgili bir qaita mán berýge, qaita qarastyrýǵa kele jatyrmyz. Taǵy bir úshinshi másele – klimattyń ózgerýi de óte kóp áser etedi. Ortalyq Aziia óńiri jahandyq klimattyq ózgeristerge, jahandyq temperatýranyń kóterilýine anaǵurlym beiim bolady. Sońǵy 100 jylda Qazaqstanda temperatýra 1,37 gradýsqa kóterilgen. Ókinishke qarai sońǵy jyldary temperatýranyń joǵarylaý úrdisi jyldam júrýde. Biz úshin bul – kúrdeli syn-qater. Bizdiń aýmaq shóleittenýge, jerdiń tozýyna tez ushyraidy. Sý resýrstarynyń bolýy da asa mańyzdy. Bizdegi barlyq sýdyń jartysyna jýyǵy syrttan keledi. Osylaisha, barlyq klimattyq ózgerister sýdyń qoljetimdi bolýyna áser etedi», - dep túiindedi Maǵzum Myrzaǵaliev.
