Ekologiia, geologiia jáne tabiǵi resýrstar ministri Maǵzum Myrzaǵaliev jumys saparymen Aqtóbe oblysyna keldi. Vedomstvo basshysy óńirdegi óndiris oryndaryn aralap, ekologiiaǵa keltiretin ziiandy azaitý baǵytyndaǵy juryspen tanysty, dep habarlaidy "Ult aqparat" oblys ákiminiń baspasóz qyzmetine silteme jasap.
Aqtóbe qalasyn lastaityn eń iri kásiporyn - Aqtóbe ferroqorytpa zaýyty. Lastaýshy óndiris oryndarynyń ishinde zaýyttyń úlesi - 50%. 2021 jyldyń aqpan aiynda kásiporyn keshendi ekologiialyq ruqsattama alyp, sonyń aiasynda óndiristi eń ozyq qoljetimdi tehnologiialarǵa kóshirý kózdelgen. Kásiporyn basshylyǵy qabyldanǵan baǵdarlama boiynsha tazartý filtrin qoiyp, 2023 jylǵa deiin qatty qaldyqty 40% azaitýdy josparlap otyr. Ministr Maǵzum Myrzaǵaliev zaýyt basshylyǵyna eń úzdik tehnologiialarǵa kóshý sharalaryn tezdetýdi tapsyrdy. Sonymen birge hromshpinel untaǵy qaldyqtarynyń ýtilizatsiiasy máselesin sheshý qajettigin aitty. Ekologiia ministri Aqtóbe hrom qosyndylary zaýytyna da baryp, jinalyp qalǵan qaldyqtardyń ýtilizatsiiasy boiynsha shara qabyldaý qajettigin eskertti. Atap ótý kerek, zaýyt jańa tehnologiialardy qoldaný arqyly byltyr las shyǵaryndylardy 1,4 esege azaitqan.
«2025 jylǵa deiin zaýyt emissiiany azaitý úshin tolyǵymen jeńdik súzgilerdi qoiady. Bul jumysty múmkindiginshe tezdetý kerek», - dedi ministr.
Aqtóbe qalasynyń ekologiialyq jáne sanitarlyq-epidemiologiialyq ahýalyna tozyǵy jetken kárizdik tazartý stantsiiasy keri áserin tigizdi. Maǵzum Myrzaǵaliev «Aktobesu-energygroup» AQ-nyń jumysymen tanysyp, jańa stantsiia salý máselesin qozǵady.
«Problemany ýaqytsha sheshý úshin ákimdik tarapynan 420 mln teńge bólinip, himiialyq reagentter arqyly qoqyspen kúres júrip jatyr. Atap ótý kerek, biz ótken jyly oblys ákimdigimen birge óńirdiń ekologiialyq problemalaryn keshendi sheshý boiynsha Jol kartasyn qabyldadyq. Qorshaǵan ortaǵa keltiriletin ziiandy azaitý jumystary sol jospar aiasynda júzege asýda», - dedi Maǵzum Myrzaǵaliev.
