Qytaidaǵy tanymal óner básekesiniń biri sanalatyn «Qytai daýysy» (Sing! China) mýzykalyq jobasyna qatysyp jatqan qandasymyz Mádina Dýmanqyzy Dimashtyń «Umytylmas kún» ánin oryndady, dep habarlaidy "Ult aqparat".
Atalǵan jobanyń 8 qazan kúni ótken 8-shi ainalymynda Mádina Dýmanqyzy Dimash Qudaibergenniń «Umytylmas kún» ánin qazaq jáne qytai tilderinde oryndap, kórermenderdiń erekshe yqylasyna bólengen. Sondai-aq, osy elde turatyn taǵy bir qandasymyz Meirambek Aqsaiuly ánge qobyz ben sybyzǵy únin qosyp súiemeldegen.
Madina Dýmanqyzy qytaidyń weibo áleýmettik jelisindegi jeke paraqshasynda osy «Qytai daýysy» jobasynda Dimashtyń ánin oryndap shyqqannan keiingi áserimen bólisken.
«Maǵan «Qytai daýysy» jobasynda Dimash aǵamyzdyń ánin oryndaýǵa múmkindik bergeni úshin Li Tszian hanymǵa rahmet aitamyn! Bul án maǵan erekshe unaidy! Baiqaýdyń osy kezeńinde maýsymdyq aýa raiynyń ózgerisine bailanysty tamaǵymdy sál qarlyqtyryp, aýyrtyp aldym. Sondyqtan ózim oilaǵandai deńgeide ándi jetkize almaǵan sekildimin. Dese de nátijesi qandai bolmasyn, óz ultymnyń ánin osy sahnaǵa alyp shyqqanyma óte qýanyshtymyn. Óz halqyńnyń bolmysyn, biik ónerin án arqyly basqalarǵa túsindirip, jetkizý maǵynaly is jáne baqytty sezimge bóleidi!», - dep ánshi áserli jazba qaldyrǵan.
