AQSh-tyń World Champions Olympic baiqaýyna qatysyp, altyn medalǵa ie bolǵan «Bastaý» dombyrashylar toby Astanaǵa kelip, Mádeniet jáne sport ministriniń qabyldaýynda boldy. Bul týraly QazAqparat jazdy.
«Biz búgin qazaq óneri asqaqtaǵan tamasha sáttiń kýási bolyp otyrmyz. 20 Arnold Shvartsnegger quryltaishy bolyp sanalatyn, jyldan astam ýaqyt boiy uiymdastyrylyp kele jatqan bedeldi baiqaýda úzdik atanyp kelýlerińizben quttyqtaimyn!», - dedi Arystanbek Muhamediuly dombyrashylardy qabyldaýda.
Ónerpazdar buǵan deiin de Latviiada ótken «Voshodiashie zvezdy» baiqaýynda jáne Izrailde ótken «World of music» saiysynda bas júldemen marapattalǵan.
Top músheleri Temirlan Oljabai men Ernat Naýryz - Qazaq ulttyq óner ýniversitetiniń stýdentteri. Ótken jyly qazaqstandyq Dimash Qudaibergen «I am singer» jobasyna qatysyp, «Daididaý» ánin shyrqaǵanda dál osy balalar dombyramen súiemeldegen.
«Qazaq ulttyq óner ýniversitetinde Ernat ekeýmiz dombyra shertetinbiz. 2017 jyly Qytaidyń Shansha qalasyna Dimashtyń kontsertine bardyq jáne ózimizdiń topty qurýdy uiǵardyq. Sol jyly 27 maýsymda Dimashtyń kontsertinde toptyń tusaýy kesilgen bolatyn. Bir jylda úsh úlken halyqaralyq konkýrstyń bas júldesin ielendik. Baiqaýdan soń, sheteldikter bizge jaqyndap, dombyranyń neshe ishegi bar dep qyzyǵýshylyq bildirip jatty. Eki ishek degenimizde tań qalatyn. Dombyranyń dybysyn gollivýdtyq saýndtrekterge qosý týraly usynystar tústi. Endi bári bolashaqtyń enshisinde», - dedi Temirlan Oljabai jýrnalisterge bergen suhbatynda.
Aita keteiik, World Championship of Performing Arts (WCOPA) - halyqaralyq talanttar olimpiadasy. Deńgeii jaǵynan WCOPA dúniejúzilik Olimpiada oiyndarymen teń. Álemdik shoý-biznestiń astanasy Los-Andjeleste osymen 22 ret uiymdastyrylǵan olimpiadada 72 memlekettiń ókilderi baq talastyrdy. Qazaqstandyq ónerpazdar bul baiqaýǵa alǵash ret qatysyp, bas júldeni ielendi.
