Búgin QR Mádeniet jáne sport ministri Aqtoty Raiymqulova Almaty oblysynyń Qarasai aýdanyndaǵy «Úshqońyr» sport mektebine bardy, dep habarlaidy QazAqparat.
Atalǵan ministrliktiń málimetinshe, onda Aqtoty Raiymqulova jergilikti turǵyndarmen kezdesip, prezident Qasym-Jomart Toqaevtyń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» Joldaýy, mańyzdy qujatta kórsetilgen mindetterdi júzege asyrý jaiynda aityp berdi. Memleket basshysynyń Joldaýynda buqaralyq sportty damytýdyń mańyzyna erekshe mán berilgeni belgili. Prezident ásirese «sport infraqurylymynyń balalar úshin barynsha qoljetimdi bolýyn qamtamasyz etý kerek» degen edi. Mádeniet jáne sport ministri «Úshqońyr» mektebi osy mindetti júzege asyrýǵa úles qosyp jatqanyn aita kele, sport salasynda júrgizilip jatqan jáne josparlanyp otyrǵan jumystardyń qorytyndysy boiynsha 2025 jylǵa qarai elimizde dene shynyqtyrý jáne sportpen shuǵyldanýshylardyń sanyn 35 paiyzaǵa deiin arttyrýǵa bolatynyn jetkizdi. Byltyrǵy jyldyń qorytyndysyna sáikes, eldegi sportpen júieli túrde ainalysatyndar sany 5,4 million adamnan asqan.
Ministr sondai-aq Joldaý sala qyzmetkerleriniń áleýmettik jaǵdaiyn jaqsartýǵa da múmkindik beretinin aitty.
«Mádeniet jáne sport ministrligi 2020 jyldan bastap mádeniet jáne óner qyzmetkerleriniń jalaqysyn arttyrý úshin Úkimettiń tiisti qaýlysyn ázirledi, ol jyl sońyna deiin qabyldanady. Mádeniet salasyna tikelei qatysy bar adam retinde osy jalaqyny arttyrý máselesiniń sheshilýin qanshalyqty kútkenimizdi túsinemin», - dedi ol.
Aita keteiik, Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń qoldaýymen osydan 3 ai buryn ashylǵan «Úshqońyr» sport kesheninde sporttyń 16 túri boiynsha úiirmeler jumys isteidi. 2 bassein bar. Balalar erkin kúres, dziýdo, boks, voleibol, jeńil atletika, taekvando men úlken tennis syndy olimpiadalyq sport túrlerinen jattyǵady. 45 jattyqtyrýshy qyzmet etetin mekemede 2 myńǵa jýyq sportshyny daiyndap shyǵarýǵa múmkindik bar. Elbasy N.Nazarbaev bul keshennen bolashaq olimpiada jeńimpazdary túlep shyǵatynyna senim bildirgen edi.
