Belarýstiń avtoritar basshysy Aleksandr Lýkashenko Minskige sanktsiia salýǵa úndeitin azamattardy qylmystyq jaýapkershilikke tartýdy qarastyratyn zańǵa qol qoidy, dep habarlaidy Azattyq.
Qujatqa sáikes, zań buzǵandar 12 jylǵa deiin bas bostandyǵynan aiyrylýy múmkin: eger sanktsiia jóninde úndeý qarapaiym azamattarǵa baǵyttalsa – 6 jyl, shetel uiymdary men biligine baǵyttalsa – 10 jyl, eger úndeýdi laýazymdy tulǵa jasasa jáne sonyń saldarynan sanktsiianyń ekonomikaǵa áseri sezilse, 12 jylǵa deiin bas bostandyǵynan aiyrý jazasy qarastyrylǵan.
Lýkashenkonyń baspasóz qyzmeti sharalardy "destrýktivti kúshterdiń ulttyq qaýipsizdikke ziian keltirý talpynysyna laiyqty jaýaby" dep atady.
Byltyr tamyzdaǵy prezident sailaýynan keiin jáne jappai qýdalaý sharalarynan soń Batys belorýs biligine sanktsiiany kúsheitken. Bir jarym jylǵa jýyq ýaqyt ishinde sanktsiialar Belarýstiń tutas ekonomikasyn qamtyǵan. Sanktsiiaǵa ilingender arasynda memlekettik kompaniialar, ondaǵan sheneýnik, sot, quqyq qorǵaý organ ókilderi, memlekettik BAQ bar.
Qarasha sońynda Lýkashenko Belarýstiń batys sanktsiiasynan zardap shekpegenin málimdep, onyń ziianyn esepteýdiń ózi qymbatyraq bolatynyn aitqan.
Osyǵan deiin Reseidegi birqatar laýazym ieleri de sanktsiiaǵa shaqyrǵandardy qylmystyq jaýapkershilikke tartý qajettigin alǵa tartqan.
