LRT qylmystyq isi boiynsha tergeý aiaqtalýǵa jaqyn. Bul týraly Sybailas jemqorlyqqa qarsy kúres qyzmetiniń ekinshi departament basshysy Sergei Perov aitty, – dep habarlaidy QazAqparat.
Tergeý nátijesine qaraǵanda, Nur-Sultan qalasy ákimdigi men Astana LRT-nyń laýazymdy tulǵalary jáne jeke kompaniialardyń direktorlary milliardtaǵan qarjy urlaǵany anyqtaldy.
«Qylmystyq isti elorda ákiminiń burynǵy orynbasary Qanat Sultanbekov jáne Astana LRT basshysy T.Ardan sheteldik jáne qazaqstandyq kompaniialardyń kómegimen uiymdastyrǵan. Osy laýazymdaǵy tulǵalar ákimdik basqarmalarynyń burynǵy basshylary R.Amanjolov, J.Nurpeiisovtyń qatysýymen 24 mlrd teńgeden astam qarajat jymqyrylǵan. Ákiminiń burynǵy orynbasary Qanat Sultanbekovke izdeý jariialandy», - deidi Sergei Perov elordada ótken brifingte.
Onyń aitýynsha, bul qarjyǵa jobalyq-smetalyq qujattamany ázirleý, keńesshilik qyzmetterdi kórsetý jáne tehnikalyq baqylaý shyǵyndary kirgen.
«Óz kezeginde, merdigerlik uiymnyń direktorlary qosalqy merdigerlik kompaniialarmen artyq baǵada jalǵan mámileler jasap, qarjyny jalǵan kásiporyndar arqyly qolma-qol aqshaǵa ainaldyrǵan. Nátijesinde memleketke 5 mlrd teńgeden artyq sommaǵa shyǵyn keldi. Is boiynsha ákimdiktiń 5 laýazymdy tulǵasy (basshylyq quramynan) jáne merdiger uiymdardyń 6 basshysy jaýapqa tartylýda. Olardyń ishinde 5 kúdikti kúzetke ustaýǵa alynǵan, 3 adam qamaýǵa alý bultartpaý sharasymen halyqaralyq izdeýge berilgen», - deidi ol.
Tergeý barysynda 3 adam óz kinásin moiyndap, sáikesinshe olarǵa qatysty qamaýǵa alý qoldanylmaǵan. Qylmysty isti tergeý osy aidyń aiasyna deiin aiaqtalýy múmkin.
Eske salsaq, Prezident LRT qurylysyn jedeldetýdi jáne oǵan qatysty isti tergeýdi tapsyrdy. Buǵan deiin LRT-nyń qurylysy ýaqytsha toqtatylǵany týraly habarlaǵan bolatynbyz. Oǵan qatysty Úkimet basshysy Asqar Mamin pikir bildirdi.
Sonymen qatar jaqynda QR Sybailas jemqorlyqqa qarsy is-qimyl agenttigi «Astana LRT» isi boiynsha birqatar jalǵan kásiporyn tergelip jatqanyn málim etti.
