Lotereia operatorynan basqa jarnamada «lotereia» sózin qoldanýǵa tyiym salý engizilip otyr. Bul týraly Mádeniet jáne sport ministri Aqtoty Raiymqulova málim etti, – dep habarlaidy QazAqparat.
«Búginde lotereia operatorymen kelisimshart boiynsha agenttik qyzmetti júzege asyratyn úsh myńnan astam sýbekt qyzmetin atqaryp júr. Zańnamada «lotereia taratýshysy» agenti uǵymynyń joqtyǵynan quqyqtyq kolliziialar paida bolyp, kóptegen jeke kásipkerlik sýbektileriniń, sondai-aq lotereia operatorynyń qyzmetine kedergi týdyrtyp otyr. Munymen qosa, zań jobasynda lotereiany zańsyz ótkizgeni úshin ákimshilik jaýapkershilik belgilendi, - dedi A. Raiymqulova Parlament Májilisiniń jalpy otyrysynda tiisti zań jobasyn tanystyrý barysynda.
Onyń sózine qaraǵanda, qazirgi ýaqytta Ákimshilik quqyq buzýshylyq týraly QR Kodeksinde lotereia operatory bolyp sanalmaityn tulǵanyń lotereia qyzmetin júzege asyrýyna tyiym salý bóliginde «Lotereia jáne lotereia qyzmet týraly» Zańynyń erejelerin iske asyrýdy qamtamasyz etetin normalar joq.
«Lotereialyq qyzmet atyn jamylyp, alaiaqtyq qyzmetti júzege asyrýdan, sondai-aq jarnamada jalǵan lotereialyq qyzmet týraly aqparat taratýdan Qazaqstan azamattary qorǵaýsyz qalyp otyr. Osyǵan orai lotereia operatorynan basqa jarnamada «lotereia» sózin qoldanýǵa tyiym salý qarastyryldy. Zań jobasymen QR Mádeniet jáne sport ministrligine quzyret berý arqyly lotereialyq qyzmetti tiimdi ári jedel memlekettik retteý tetigi engizilip otyr. Iaǵni lotereia ótkizýdiń erejelerin bekitý, lotereia ótkizýdiń tásilderine qoiylatyn talaptardy bekitý eskerilgen. Bul sharalar bir jaǵynan lotereia qyzmeti salasyn damytýdy ári aqparattyq tehnologiialar qoldanýdy shektemeýge múmkindik beredi. Ekinshi jaǵynan, ýákiletti organ retinde ministrlikke lotereia qyzmeti salasyndaǵy quqyqqa qarsy qyzmetti tiimdi shekteýge jol ashady», - dedi A. Raiymqulova.
Budan buryn habarlanǵandai, Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine lotereialar jáne lotereia qyzmeti máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
