Parlament Májilisiniń jalpy otyrysynda Mádeniet jáne sport ministri Aqtoty Raiymqulova ulttyq lotereiany satýdan túsken qarjy qai baǵytta jumsalatynyn aitty, dep habarlaidy QazAqparat.
«Zańnamaǵa sáikes, toqsan saiyn sportty damytýǵa tiisti soma tólenedi. Zań boiynsha bul deńgei 10 paiyzdy quraidy. Konkýrs nátijesi aiasynda «Sátti juldyz» óz tabysynyń 15 paiyzyn tóleý mindetin aldy. Búginde 376 mln teńge tólengen, taǵy da 421,7 mln teńge bólinedi. Qazirgi tańda bul qarjy Ulttyq Olimpiada komitetine baǵyttalýda. Iaǵni ákimshilik shyǵyndar men jarǵylyqty qyzmetterdi oryndaýǵa, olimpiadalyq sportty qoldaýǵa arnalǵan», - dedi A. Raiymqulova.
Budan buryn habarlanǵandai, Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine lotereialar jáne lotereia qyzmeti máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Lotereia týraly qysqasha túsindirme bergim keledi. Lotereiada lotereia operatory qatysýshylardyń aqshasyn jinaidy jáne keiinnen olardy osy qatysýshylardyń arasynda taratady. Barlyǵyna emes, sátti túskenderge kepildik beredi. Sonymen qatar, jinalǵan qarajattyń bir bóligin eldegi sporttyń damýyna baǵyttaidy. Lotereia operatorynyń mindeti - utystardy lotereia qatysýshylary arasynda erkin tańdaý tásilimenen bólip berý», - dep túsindirdi ministr. Osy oraida A. Raiymqulova lotereia elimizde memleket baqylaýynda ekenin atap ótti.
Aita keteiik, Lotereiany zańsyz ótkizgenderge jaýapkershilik belgilendi.
