Foto: QR shahmat federatsiiasy
Qazaqstan shahmatshylary Londonda ótken blitsten komandalyq álem chempionatynda tamasha sheberlik kórsetip, komandalyq kúmis (KazChess komandasy) jáne alty jeke júlde, sonyń ishinde eki altyn medal jeńip aldy, dep habarlaidy Ult.kz Qazaqstan shahmat federatsiiasynyń baspasóz qyzmetine silteme jasap.
Tamasha oiynymen jáne qaitpas jigerimen erekshe kózge túsken KazChess komandasy finalǵa shyqty.
«Londonda ótken blitsten komandalyq álem chempionatynda tamasha oiyn kórsetip, kúmis medal jeńip alǵan Kazchess komandasyn quttyqtaimyz! Biz shynymen de myqty jáne yntymaǵy jarasqan ujym qurdyq – jas shahmatshylarymyz ben tájiribeli oiynshylarymyz búkil týrnirdi abyroimen ótkizip, sońyna deiin kúresti. Bul týrnir bizdiń álemniń eń myqty komandalarymen teń dárejede básekege túsip jatqanymyzdy taǵy da dáleldedi. Oiynshylarymyzdyń jasy men ambitsiiasyn eskere otyryp, aldaǵy ýaqytta talai ret úlken jeńiske jetemiz dep senimmen aitýǵa bolady», – dedi Qazaqstan shahmat federatsiiasynyń prezidenti Timýr Týrlov.
KazChess atynan qatysqandar:
- - Aleksandr Grishýk (2683, FID)
- - Rihard Rapport (2631, Vengriia)
- - Andrei Esipenko (2646, FID)
- - Dármen Sádýaqasov (2575)
- - Aldiiar Ańsat (2488)
- - Merýert Kamalidenova (2255)
- - Elnaz Qaliahmet (2189)
- - Islam Aiten (1929, áýesqoi shahmatshy)
- - Kapitan — Gúlmira Dáýletova.
«Biz óte baqyttymyz. Qazaqstan shahmaty úshin bul úlken jetistik», – dedi Qazaqstan shahmat federatsiiasynyń birinshi vitse-prezidenti jáne komandanyń múshesi Dármen Sádýaqasov.
KazChess komandasy D tobyndaǵy oiynda ekinshi orynǵa shyqty, sodan keiin 1/8 finalda Rookies komandasyn jeńdi, shirek finalda Freedom ujymyn basyp ozdy jáne jartylai finalda Uzbekistan komandasynan basym tústi. Finalda KazChess oiynshylary WR Chess Team ujymymen kezdesti, ol chempion ataǵyna laiyq ekenin dáleldep, 75 000 eýro aldy. Vitse-chempiondarǵa – 50 000 eýro, kúmis júldegerlerge – 30 000 eýro, 4-shi oryn alǵandarǵa – 20 000 eýro, 5-shi orynǵa taban tiregen komandaǵa 15 000 eýro tabys etildi.
Foto: QR shahmat federatsiiasy
Qazaqstannyń alty ókili jeke esepte erekshelenip, týrnirlik perfomans boiynsha anyqtalatyn toǵyz taqtanyń árqaisysynda úzdik oiynshylar úshtigine endi. Erǵali Súleimen (Rookies, 7-shi taqta) men Aldiiar Sailaýbai (Ashdod Elit Chess Club, 9-shy taqta) altyn medal jeńip aldy. Aldiiar Ańsat (KazChess, 6-shy taqta), Kseniia Balabaeva (Barys.kz, 7-shi taqta) jáne Dármen Dáýren (Rookies, 9-shy taqta) kúmis júldeni qanjyǵasyna bailady. Daniial Sápenov (Rookies, 2-shi taqta) qola medalge ie boldy.
Rapid pen blitsten 2025 jylǵy komandalyq álem chempionaty – tarihtaǵy úshinshi is-shara. Birinshisi 2023 jyly Diýsseldorf qalasynda ótti, ekinshisin 2024 jyly Astana qabyldady. Al biyl 11-15 maýsym aralyǵynda Londonda 52 komanda jinaldy. Bir kún buryn rapidten jarys aiaqtaldy: Team MGD1 altyn, Hexamind Chess Team kúmis, Freedom komandasy qola medal aldy. Blitste (3 minýt + ár júris úshin 2 sekýnd) komandalar alty taqtada: tórt negizgi, bir áielder taqtasynda, reitingi 2000-nan tómen áýesqoi oiynshyǵa arnalǵan bir taqtada baq synasty.
Komandalyq kúmis júlde men alty jeke medaldi qanjyǵasyna bailaǵan Qazaqstan óziniń álemdik deńgeidegi shahmat mektebi bar el ekenin kórsetti. Bizdiń sportshylar qundy tájiribe alýmen qatar, eń bedeldi týrnirlerde joǵary oryndarǵa shyǵý úshin jarysqa túsýge qabiletti ekendikterin dáleldedi.
